Ձեր վստահելի աղբյուրը

«Ընդհանրապես, պատերազմի մասին երազում են հիվանդ մարդիկ։ Ինչպե՞ս կարելի է երազել պատերազմի մասին»,- Գյումրիում լրագրողների հետ զրույցում ասաց Արցախի  Հանրապետության նախագահի մամուլի խոսնակ Դավիթ Բաբայանը՝ ի պատասխան Ադրբեջանի պաշտպանության նախարար Զաքիր Հասանովի այն հայտարարության, որ երազում են պատերազմի մասին, որը շատ մոտ է։

Նա ընդգծեց, որ պետք է նման հայտարարություններին լուրջ վերաբերվել, չի բացառվում, որ Ադրբեջանն անցնի ահաբեկչական այլ քաղաքականության՝ փորձի արտասահմանում առևանգի հայերի՝ երգիչների, քաղաքական, հասարակական գործիչների, հետո կրկին փորձի փոխանակման այլասերված տարբերակն առաջարկել՝ ահաբեկիչներին, հանցագործներին փոխանակի արդեն պատանդ գտնվող հայերի հետ. «Սա բացառված չէ, մենք պետք է շատ լուրջ վերաբերվենք այդ հարցերին»։

Հարցին, թե Ադրբեջանում կազմավորվում է մանկահասակ մահապարտների ջոկատ, ինչպե՞ս պետք է հայկական կողմը դրան պատրաստվի, նա ասաց. «Իհարկե, մահապարտների ջոկատն  այդ նույն պատերազմի հրճվանքի հետևանքն է, որովհետև երկիրը, որը պատերազմում օգտագործում է երեխաների, պարզապես անմարդկային է»։

Ինչ վերաբերում է ՀՀ վարչապետ Նիկոլ Փաշինյանի հայտարարությունը՝ «Արցախը Հայաստանն է և վերջ», ու պատասխանելով հարցին, թե Արցախում հենց այդ արտահայտությունի՞ց էին վիրավորված, Դ. Բաբայանը պատասխանեց. «Իսկ ով չի ուզում, որ պաշտոնապես  դարձնենք մեկ միասնական պետություն։ Բայց դրա համար ձև, ժամանակ կա։

Մենք սեպտեմբերին ունենք երկու կարևոր իրադարձություն՝ Արցախի Հանրապետության ու Հայաստանի անկախության հռչակումը։  Այս պահի դրությամբ այդպես է ստացվել, մենք չենք ընտրել այդ ճանապարհը, պարտադրված էր ինչ որ ձև, միջազգային, աշխարհաքաղաքական տարբեր զարգացումներով։ Ունենք երկու պետություն, բայց մեկ ընդհանուր հայրենիք, մեր նպատակն է  որպեսզի երկու պետությունը դառնա մեկ  պետություն, ունենանք մեկ ընդհանուր հայրենիք և մեկ պետություն։ Դրան մենք ուշ թե շուտ հասնելու ենք, բայց դրա համար պետք է լավ աշխատանք, միասնական դառնանք։ Մենք այն երկիրն  ենք, որ պարտավոր ենք ճկուն լինել, ճիշտ աշխարհաքաղաքականություն վարել։ Եթե խոսում են, ասում են, որ  Արցախը Հայաստանի մարզ է, մենք Հայաստանին դնում ենք սարսափելի ծանր իրավիճակի մեջ և թիրախավորում ենք։ Այո, Արցախն էլ է Հայաստան, հայոց երկրի մի մասն է, բայց Արցախի Հանրապետությունը Հայաստանի Հանրապետություն չէ դեռևս։ Միգուցե ժամանակ կգա և կունենանք մեկ ընդհանուր պետություն։ Ես էլ եմ դրա մասին  երազում»։

Խոսելով Հայաստանի և Արցախի միջև անհամաձայնության մասին, Դ. Բաբայանն ասաց, որ անհամաձայնություն չի նշանակում թշնամանք, այլ տարբեր կարծիքներ, ցանկացած նորմալ երկրում պետք է լինեն տարբեր կարծիքներ։

«Դա չի նշանակում, որ պետք է մեկը մյուսին լինենք թշնամի։ Իրավունք չունենք, որևէ մեկն իրավունք չունի, ով ուզում է  լինի, ինչ պաշտոն ուզում է զբաղեցնի, իրենց քմահաճույքը չէ, «հոր տունը չէ», բոլորը պետք է այնպես անեն, որ միասնականություն լինի։ Պաշտոնական Երևանը պարտավոր է  պաշտոնական Սեփանակերտի հետ նորմալ հարաբերություններ ունենալ։ Նույնը՝ պաշտոնական Ստեփանակերտը պարտավոր է պաշտոնական Երևանի հետ ունենալ նորմալ հարաբերությունները։ Սկզբունքային անհամաձայնությունն Արցախի ապագայի վերաբերյալ՝ նման բան չկա»,- ասաց Դ. Բաբայանը։

Հարցին, թե ղարաբաղյան հակամարտության լուծման առումով տեսակետները համընկնո՞ւմ են, նա դրական արձագանքեց. «Կարծում ենք՝ հակամարտության լուծումը պետք  է այնպես լինի, որ մեր անվտանգությունն ապահովվի, որևէ մեկը գայթակղություն չունենա նորից վերանայել այդ լուծումը, լինի երկարատև, միգուցե հավիտենական։ Մինչև դա չլինի, որևէ տարբերակ ընդունելի չէ»։

Դ. Բաբայանը շատ լավ է գնահատում Հայաստանի ջանքերը Արցախին  բանակցային սեղան վերադարձնելու ուղղությամբ. «Ի սկզբանե ողջունել ենք, նշել, որ բարդ, երկարատև, ժամանակատար, աշխատատար գործընթաց է, Ադրբեջանն ամեն ինչ անում է, որպեսզի խոչընդոտի»։

Հարցին, թե հայտարարում են, որ Արցախը բանակցւթյուններից դուրս է մնացել նախկին իշխանությունների  ժամանակ, Դավիթ Բաբայանը պատասխանեց. «Արցախը բանակցային գործընթացից դուրս է եկել Ալիևի, Ադրբեջանի քաղաքականության շնորհիվ։ Եթե Ադրբեջանը չի ուզում մեզ հետ բանակցել, դա իր որոշումն է, բայց առանց դրա չի լինելու հակամարտության կարգավորում։ Ընտրությունն իրենն է»։