Ձեր վստահելի աղբյուրը

«Պարոն Վանեցյանը, դե յուրե լինելով Ազգային անվտանգության ծառայության տնօրեն, հայտարարություն է  անում ըստ էության իր գերագույն հրամանատարի դեմ և լինելով վարչապետի ենթակա մարմնի ղեկավար՝ հայտարարություն է անում իր գերագույն հրամանատարի դեմ, դրանից ավելի մեծ անարգանք սպայի պատվի դեմ չկա։ Հասկանո՞ւմ եք չէ, դա ինչ է նշանակում»,-Լոս Անջելեսում ԱԱԾ տնօրենի պաշտոնից Արթուր Վանեցյանի հրաժարականի մասին հնչեցրած հարցին ի պատասխան՝ հայտարարեց վարչապետ Նիկոլ Փաշինյանը։

Նրա խոսքով, «դա  պետք է հետաքննվի»։ Փաշինյանն ասաց՝ չի իմացել, որ Արթուր Վանեցյանի տարածած հայտարարությունը տեղադրվել է ծառայության պաշտոնական էջում, որն ավելի ուշ հանվել է։

«Ինձ թվացել էր, որ հրամանագիրն արդեն ստորագրվել է։ Սպան նման բան անի՞, դա գիտե՞ք ինչ է։ Դա նշանակում է  ուսադիրները գցել աղբամանը։ Նման բան վերջին անգամ արել են 91 թվականի պուչիստները։ Նոր Հայաստանի կառավարությունն էն կառավարությունը չի, և Հայաստանի Հանրապետությունը էն երկիրը չի, որտեղ կարող է նման բան տեղի ունենալ։ Բայց դա անարգանք է Հայաստանի Հանրապետության զինված ուժերի նկատմամբ։ Եվ ես շատ ուրախ եմ, որ Հայաստանի հանրությունը շատ հստակ այս երևույթին իր գնահատականը տվել է»,-ասաց նա։