Ձեր վստահելի աղբյուրը

«Վայոց Ձորի մարզպետն իր կլաններով ինչքան ուժ ունի փորձում է առաջին՝ իր մասնակցությունը դուրս բերի այդտեղից, երկրորդ՝ մեղավորությունը բարդի սպայի վրա»,- լրագրողների հետ զրույցում ասաց պահեստազորի փոխգնդապետ Կարեն Հակոբյանը, որը մասնակցում էր կառավարության դեմ իրականացավող ակցիայի։

Ակցիայի մասնակիցները պահանջում են  սեպտեմբերի 17-ին Եղեգնաձորում ծեծի ենթարկված  փոխգնդապետ Արա Մխիթարյանի գործի ամբողջական, արդար քննություն։

Նա նշեց, որ այսօր չի ուզում ոչ մեկին արդարացել, ոչ էլ դատապարտել, ընդամենը ցանկանում են արդար քննություն, որը Վայոց ձորի ոստիկանության կողմից չի իրականացվում. «Վկային ահաբեկում են, վկան ահազանգում է, ոստիկանությունն արձագանքում է 40 րոպե հետո։ Մարզպետի շքախումբը եղել է հարբած վիճակում, ինչը ոչ մի տեղ չի արձանագրվում, իրենցից ոչ մեկին չեն տարել դատաբժշկական փորձաքննության։  Արա Մшխիթարյանի հետ եղել են երկու սպա, ստացել են մարմնական վնասվածք։ Կանչել են դատաբժիշկ, դատաբժիշը չի արձագանքում։ Իսկ ամենավերջին փաստն այն է, որ դեպքից չորս օր հետո նոր բոլորն արձագանքում են, իսկ այսօր Արա Մխիթարյանը կռիվ է տալիս իր կյանքի համար, ապրելու հնարավորությունը 1 տոկոս է»։

Կ.Հակոբյանն ասաց, որ բացի սպաներից, կա ականատես, որը ցուցմունքում գրել է իր տեսածը, ինչից հետո սկսել են տվյալ անձնավորությանն ահաբեկել։

«Մենք չենք հերքում, որ խմած են եղել, բայց իրենք էլ են խմած եղել։ Մենք պահանջում ենք, որպեսզի արդար քննություն իրականացվի համապատասխան մարմինների կողմից, կոչ ենք անում դատախազին, Հայաստանի ոստիկանապետին իրենց անմիջական հսկողության տակ վերցնել գործի քննությունը, որովհետև չենք հավատում Վայոց Ձորի ոստիկանությանը»,- ասաց պահեստազորի փոխգնդապետը։

Նա նշեց, որ նախորդ իշխանության ժամանակ էլ եղել են դեպքեր սպաների հետ կապված. «Հին բարքերը գալիս են նոր Հայաստա՞ն, թե տարբերություն չկա՝ հին Հայաստան, նոր Հայաստան։ Եթե մարդիկ ուզում են ինքնահաստատվել, թող գնան սահմաններում կանգնեն։ Իրենց կեսից շատը մարզպետի գլխավորությամբ չեն ծառայել, թող գնան, սահմանամերձ շրջան է, գոնե երկու ամիս սահման պահեն ու հասկանան սպայի ու զինվորականի ղադրը, ոչ թե քարով բռնեն...»։ 

Ակցիայի մասնակից պահեստազորի սպա, «Իրավունքի սահման» ՍՊ տնօրեն  Գևորգ Հովհաննիսյանն ասաց, որ հեղափոխությունն արժեհամակարգի փոփոխություն է ենթադրում, բայց «ներողության, այս դեղնակտուցների օրոք որևէ բան չփոխվեց»։

«Սա էլ երկրորդ դեպքն է այս իշխանության օրոք։ Նախորդն էլ կապված է Կոտայքի մարզպետի եղբոր կողմից սպայի նկատմամբ, որի առնչությամբ իրականացվող քրեական գործով տասնյակ միջնորդագրերը, դիմումները  պատասխան չեն ստանում,  կոծկվում է։ Էլի ծեծ, բռնություն։
Ո՞ւր ենք սենց գնում, շատ հեռու չենք գնացե՞լ։  Չէ որ սա ալիքի նման տարածվում է ներկայումս ծառայություն իրականացնող սպաների վրա»,- նշեց Գ. Հովհաննիսյանը։

Նա համոզված է, որ կոծկվելու է, դեռ ավելին, գտնվելու են փաստեր, որ իբրև թե այդ սպան սադրել է, մեջքին կան չար, սև ուժեր կանգնած։

«Սա է մեր իշխանությունը, մենք սրա համա՞ր կանգնեցինք այս մարդկանց  կողքը։ Եթե մենք սխալվել ենք, մեր սխալը կուղղենք»,- ասաց պահեստազորի սպան։

Նա նշեց, որ շատերն էին այսօր ուզում իրենց հետ մասնակցել ակցիային, սակայն այդպես հակառակորդի ջրաղացին ջուր կլցնեն, դեռ սպասում են, տեսնեն՝ ինչ են անում, ինչ է լինելու։

«Նախորդների հետ  չեմ ուզել աշխատել, որովհետև համակարգը բացակայում էր, իսկ հիմա համակարգը քանդվում է բոլոր բնագավառներում։ Ո՞ւր ենք սենց գնում», -ասաց Գ. Հովհաննիսյանը։

Հիշեցնենք, որ սեպտեմբերի 18-ին Եղեգնաձոր քաղաքի Արսենյան փողոցի շենքերից մեկի բակում վիճաբանության ընթացքում Եղեգնաձոր քաղաքի 28-ամյա բնակիչն ու նրան օգնության հասած 3-4 անձինք  ծեծի են ենթարկել սպաների: Ըստ ԶԼՄ-ների, ծեծկռտուքի հիմնական դերակատարը մարզպետի օգնական Հարություն Գրիգորյանն է, որը ծանր վնասվածքներ է հասցրել փոխգնդապետ Արա Մխիթարյանին։ ՊՆ կենտրոնական կլինիկական հոսպիտալ տեղափոխված սպան շտապ վիրահատվել է, նրա վիճակը ծայրահեղ ծանր է:

Քննչական կոմիտեից այսօր տեղեկացրել են, որ Վայոց Ձորի մարզային քննչական վարչությունում քննվող քրեական գործի շրջանակներում ձեռնարկվում են անհետաձգելի քննչական գործողություններ, մարզում տեղի ունեցած միջադեպին Վայոց Ձորի մարզպետի մասնակցությունը ստուգելու ուղղությամբ:

Սեպտեմբերի 21-ին լրագրողների հետ զրույցում Վայոց Ձորի մարզպետ Տրդատ Սարգսյանը հայտնել էր, որ ինքը մասնակցություն չի ունեցել դեպքին, ինքն այդ ժամին տանն է եղել, շենքի բակի տեսախցիկները ֆիքսել են, թե ինչպես է մեքենան կայանում ժամը տասի կողմերը և բարձրանում տուն։ Այս գործով մարզպետի օգնականը կալանավորված է։