Ձեր վստահելի աղբյուրը

Նախաքննության այս փուլում որևիցե արտահայտություն՝ մասնավորապես պաշտպանության նախարարի կողմից, շատ սխալ կլինի։ Այս մասին այսօր լրագրողների հետ զրույցում ասաց Պաշտպանության նախարար Դավիթ Տոնոյանն՝ անդրադառնալով օրեր առաջ Վայոց ձորի մարզում տեղի ունեցած միջադեպին և մարզպետի լիազորությունները վայր դնելուն։

«Ես ևս մեկ անգամ ասում եմ, որ մենք հետևողական ենք լինելու, որպեսզի ամեն ինչը մինչև վերջ պարզվի, դատաքննության, նախաքննության փուլերում արդարությունը և ազնվությունը պետք է ապահովված լինեն: Մենք իրականում հետևելու ենք, քանի որ նա մեր գործընկերն է։ Մեր զինակցի դեպքը ոչ մարտական պայմաններում պետք է պատասխան ստանա»,- նշեց Դավիթ Տոնոյանը։

Հիշեցնենք, որ 2019թ. սեպտեմբերի 18-ին՝ ժամը 00:20-ին,  ՀՀ ոստիկանության Վայոց Ձորի վարչությունում «Եղեգնաձոր բժշկական կենտրոն» ՓԲԸ-ից հաղորդում է ստացվել այն մասին, որ անգիտակից վիճակում իրենց մոտ է տեղափոխվել Շիրակի մարզի բնակիչ,  ՀՀ ՊՆ զորամասի սպա: 2019թ. սեպտեմբերի 18-ին ՀՀ ՊՆ կենտրոնական կլինիկական հոսպիտալից գրություն է ստացվել այն մասին, որ նույն օրը՝ ժամը 06:40-ին, իրենց մոտ է ընդունվել նշված սպան՝ «Փակ ծանր ԳՈՒՎ: գլխուղեղի աջ կիսագնդի միջին աստիճանի սալջարդ, աջ քունք-գագաթային, ճակատային բլթերի շրջանի սուբդորալ հեմատոմա՝ արտահայտված քունքտենտորյալ լատերալ դիսլոկացիայով» նախնական ախտորոշումով: Կատարվել է շտապ վիրահատություն, վիճակը գնահատվում է ծայրահեղ ծանր:

Ըստ ԶԼՄ-ների՝ ծեծկռտուքի հիմնական դերակատարը մարզպետի օգնական Հարություն Գրիգորյանն է, որը ծանր վնասվածքներ է հասցրել փոխգնդապետ Արա Մխիթարյանին։
Քննչական կոմիտեից այսօր տեղեկացրել էին, որ Վայոց Ձորի մարզային քննչական վարչությունում քննվող քրեական գործի շրջանակներում ձեռնարկվում են անհետաձգելի քննչական գործողություններ, մարզում տեղի ունեցած միջադեպին Վայոց Ձորի մարզպետի մասնակցությունը ստուգելու ուղղությամբ:

Սեպտեմբերի 21-ին լրագրողների հետ զրույցում Վայոց Ձորի մարզպետ Տրդատ Սարգսյանը հայտնել էր, որ ինքը մասնակցություն չի ունեցել դեպքին։ Այդուհանդերձ, մարզպետն այսօր հայտարարեց լիազորությունները վայր դնելու մասին։