Ձեր վստահելի աղբյուրը

ՀՀ պաշտպանության նախարար Դավիթ Տոնոյանն այսօր լրագրողների հետ զրույցում անդրադառնալով ՊԲ դիրքերի ուղղությամբ հակառակորդի կողմից դիվերսիոն ներթափանցման փորձին՝ նշեց, որ չի կարող ասել, թե ինչով է պայմանավորված Ադրբեջանի ակտիվությունը։

Նրա խոսքով՝ դիվերսիան տարօրինակ է եղել. «Թե գործողության ժամի առումով էր շատ տարօրինակ, թե ներգրավված անձնակազմի թվաքանակով, թե հատուկ նշանակության ստորաբաժանման ներկայացուցիչների ներգրավմամբ»։

Այնուհետև նախարարը հեգնանքով ավելացրեց. «Միգուցե մոլորվել են»։

Հարցին՝ ո՞րն է լինելու հայկական կողմի պատասխանը, Դավիթ Տոնոյանն ասաց. «Այս պահին մենք պատասխան տալու չունենք, հակառակը՝ մեր հումանիտար պարտքը կատարել ենք, պաշտպանական բանակը իրականացրել է այն, ինչ պետք է իրականացներ»:

Նա նաև ասաց, որ այս պահին վերլուծություն են կատարում՝ հասկանալու համար, թե իրականում ինչ է կատարվել. «Նորից կրկնում եմ՝ թե ժամի առումով, թե ներգրավված թվաքանակի, թե իրենց գործողությունների առումով, շատ տարօրինակ բան է կատարվել»։

Պաշտպանության նախարարը  նշեց, որ դիվերսիոն ներթափանցման փորձի ժամանակ հակառակորդը չեզոք գոտում թողել էր մեկ դիակ, և ժամը 19.00-ի սահմաններում արդեն փոխանցված է եղել ադրբեջանցի զինծառայողի դիակը:

Հիշեցնենք, որ սեպտեմբերի 22-ին՝ ժամը 16:15-ի սահմաններում, արցախա-ադրբեջանական հակամարտ զորքերի շփման գծի հարավ-արևելյան հատվածում տեղակայված մարտական դիրքերից մեկի ուղղությամբ հակառակորդը ձեռնարկել է դիվերսիոն ներթափանցման փորձ:
ՊԲ դիրքապահ անձնակազմի գրագետ գործողությունների արդյունքում՝ հակառակորդը, չեզոք գոտում թողնելով մեկ դիակ, հետ է շպրտվել իր ելման դիրքերը: ՊԲ-ն որևէ կորուստ չի ունեցել: