Գլխավոր դատախազ. Երբեք չեմ ասի, որ «Մարտի 1»-ի գործը փակուղում է

Իրավունք 14:46 25/09/2019 Հայաստան

«Մարտի 1»-ի գործի քննությունը շատ ակտիվ իրականացվում է, իսկ յուրաքանչյուր դետալ, էլ չեմ ասում այսպիսի կարևոր իրադարձություն, իր առանցքային նշանակությունն է ունենալու որոշակի վարկածների ընտրության, և այդ վարկածներով որոշակի ուղղությամբ քննությունը խորացնելու համար»,- լրագրողների հետ զրույցում ասաց ՀՀ գլխավոր դատախազ Արթուր Դավթյանը՝ պատասխանելով հարցին, թե կարո՞ղ է «Մարտի 1»-ի գործով վկա նախկին ստիկանապետ Հայկ Հարությունյանի մահն ազդեցություն ունենա «Մարտի 1»-ի բացահայտման վրա:

Հարցին՝ ժամանակին ասել էիք, որ «Մարտի 1»-ի գործով շղթան բացահայտվել է, մինչդեռ Գեղամ Պետրոսյանն ազատ է արձակվել, գլխավոր դատախազն ասաց. «Շղթան բացահայտելու ուղղությամբ քայլեր են իրականացվում, ձեռք էին բերվել փաստական տվյալներ, ես ևս մեկ անգամ վերահաստատում եմ, որ բավարար էին դատավարական այնպիսի որոշում կայացնելու համար, որպիսին կայացվեց: Բայց հետագա քննության ընթացքում ձեռք բերվեցին այնպիսի տվյալներ, որոնց պայմաններում կալանքը որպես խափանման միջոց ընտրելու հիմքերը բացակայում էին: Հետապնդումը շարունակվում է, ստուգվում են այդ վարկածները: Մեծ ու բարդ աշխատանք է կատարում քննչական մարմինն այդ ուղղությամբ»:

Ա. Դավթյանն ասաց, որ երբեք չի ասի, որ գործը փակուղում է. «Չեմ ասի, ոչ թե որովհետև չեմ ցանկանա ասել, այլ որովհետև այդ ուղղությամբ միշտ ակտիվ գործողություններ են իրականացվում: Մենք կարո՞ղ էինք 5-7 տարի առաջ ասել, որ այն ինչ բացահայտվեց, կբացահայտվեր: Հետևաբար, ես վստահ եմ, որ դետալները բացահայտվելու են: Դա կլինի վաղը, մեկ ամսից, երկու ամսից, մեկ տարուց, չեմ կարող դա ասել»:

Գլխավոր դատախազը նաև հայտնեց, որ «Մարտի 1-ի» գործով հարցաքննվել է Աղվան Հովսեփյանը։

Հարցին, թե նա ի՞նչ կարգավիճակ ունի, Արթուր Դավթյանն ասաց. «Հետագան ըստ ապացույցների կերևա»:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: