Ձեր վստահելի աղբյուրը

Հայ Առաքելական եկեղեցու Տավուշի թեմի առաջնորդ Գերաշնորհ Տեր Բագրատ եպիսկոպոս Գալստանյանին հայտնի չեն եկեղեցականներ, ովքեր ուզում են պետականության, կառավարության «ոտքի տակը քանդել»։

«Չէի ցանկանա ավելորդ անգամ անդրադառնալ Ձեր նշած արտահայտությանը, մանավանդ համատեքստից կտրված լինելով: Արդեն իսկ Մայր Աթոռի Տեղեկատվական համակարգի տնօրեն Տեր Վահրամ քահանա Մելիքյանը լիարժեք կերպով անդրադարձել է՝ նշելով, որ հավելյալ պարզաբանման կարիք կա։ Նման հայտարարության համար, ճիշտ կլիներ կոնկրետ անուններով խոսել, թե ովքեր են նրանք, որոնք ուզում են կառավարության, պետության «ոտքի տակը քանդել»։ Կարծում եմ, որ նմանատիպ հայտարարությունները՝ «ծնկի բերելու» և այլնի մասին, ընդհնարապես հարիր չէ»,-Panorama.am-ի հետ զրույցում ասաց սրբազանը՝ խոսելով վարչապետ Նիկոլ Փաշինյանի՝ ԱՄՆ-ում արված հայտարարության վերաբերյալ։

Նա ընդգծեց, որ հայ եկեղեցու, եկեղեցականի համար հայոց պետականությունը ընդհանրապես որևէ պայմանում, հանգամանքում, որպես Հայ Եկեղեցու մտածողություն մշտապես բարձրակրետ է եղել, և պատմության գնահատականն էլ պետք է ճիշտ տրվի։

«Հատկապես վերջին շրջանում շատ է փորձվում պատմությանը գնահատականներ տալ ըստ կամեցողության և անձնական մեկնաբանության՝ ցավոք, ընդհանրապես և մշտապես ներկայացվելով սովետական պատմագիտության լույսի, ծանր գաղափարախոսական ազդեցության ներքո: Առանց մանրամասնությունների մեջ մտնելու, ցանկանում եմ շատ կարճ վերստին հաստատել, հայ եկեղեցու համար իր սկզբնավորությունից ի վեր հայոց պետականությունը եղել է և մնում է բացարձակ արժեք և հայ ժողովրդի անվտանգության ու գոյության երաշխավոր: Այլ կերպ չի կարող լինել և բոլոր փորձերը այլ երանգով ու գույնով ներկայացնելու հայ եկեղեցին պարզապես դատապարտված են»,- ասաց Տեր Բագրատ եպիսկոպոս Գալստանյանը։

Հարցին, թե վերջին շրջանում հայ եկեղեցին, եկեղեցականը շատ է թիրախավորվում, ինչի՞ մասին է դա վկայում, սրբազանն ասաց. «Ընդհանրապես եկեղեցին անկախության շրջանից ի վեր անընդհատ թիրախավորվել է թե՛ արտաքին և թե՛ ներքին զանազան ուժերի կամ շարժումների կողմից: Վերջին տարիներին առավել ևս, իսկ վերջին ժամանակահատվածներում կարծես ուղղակիորեն խորը նպատակադրությամբ։ Կարծում եմ, որ սա նաև ժամանակների տրամաբանությունն է՝ թուլացնել կամ վերացնել հոգևոր, համայնքային հաստատությունները, հավատքի օջախները, եկեղեցին, ընտանիքը, պետականության հիմասյուները։ Աշխարհում, այսպիսի անդեմ, անդիմագիծ զանգվածների, թվանշային մարդկանց խումբ ստեղծելու անհասականալի շարժում է տեղի ունենում, որից անխուսափելի է նաև մեր երկիրը։ Վկան նաև վերջին մի քանի օրերին Բի-Բի-Սի-ի, իրարահաջորդ հրապարակումներն են: Այս բոլոր տարիներին բազմաթիվ իրագործումների շարքին նման հեղինակավոր ընկերության կողմից դրական ոչ մեկ նյութ չենք տեսել Հայ Եկեղեցու մասին: Հանկարծ ինչո՞ւ կամ ինչպե՞ս որոշվեց, որ նման ծավալի տեղեկատվություն կամ հետաքրքրություն պետք է լինի հայ եկեղեցու հանդեպ։ Սա խոսում է այն մասին, որ այս պարագայում հայ եկեղեցու հանդեպ որոշակի տրամադրվածության թիրախավորվածություն գոյություն ունի։ Մյուս կողմից էլ, վկայում է այն մասին, թե եկեղեցին որքան մեծ, կարևոր և առանցքային դերակատարություն ունի մեր կյանքում, պետության, պետականության կյանքում, որն ուղղակիորեն թիրախավորված է՝ նկատվելով որպես պատվար այն ուժերի հանդեպ, որոնք փորձում են այս կամ այն ճանապարհով թուլացել մեր կյանքը, խարխլել մեր ինքնության հիմքերը»։