Ձեր վստահելի աղբյուրը

Վայոց Ձորի  մարզպետ Տրդատ Սարգսյանի մտերիմների կողմից ծեծված փոխգնդապետ Արա Մխիթարյանի վիճակը դեպքից ինն օր անց շարունակում է մնալ ծայրահեղ ծանր։ 

«Փոխգնդապետ Արա Մխիթարյանի  վիճակը մնում է ծայրահեղ ծանր, բժիշկները պայքարում են նրա կյանքի ու առողջության համար»,-գրել է առողջապահության նախարար Արսեն Թորոսյանը, ով միայն այսօր է այցելել սպային։

Հիշեցնենք, որ սեպտեմբերի 17-ին Եղեգնաձոր քաղաքի Արսենյան փողոցի շենքերից մեկի բակում վիճաբանության ընթացքում Եղեգնաձոր քաղաքի 28-ամյա բնակիչն ու նրան օգնության հասած 3-4 անձինք  ծեծի են ենթարկել սպաների: Ըստ ԶԼՄ-ների, ծեծկռտուքի հիմնական դերակատարը մարզպետի օգնական Հարություն Գրիգորյանն է, որը ծանր վնասվածքներ է հասցրել փոխգնդապետ Արա Մխիթարյանին, որը տեղափոխվել է ՊՆ կենտրոնական կլինիկական հոսպիտալ:

Քննչական կոմիտեից տեղեկացրել են, որ Վայոց Ձորի մարզային քննչական վարչությունում քննվող քրեական գործի շրջանակներում ձեռնարկվում են անհետաձգելի քննչական գործողություններ, մարզում տեղի ունեցած միջադեպին Վայոց Ձորի մարզպետի մասնակցությունը ստուգելու ուղղությամբ:

Սեպտեմբերի 21-ին լրագրողների հետ զրույցում Վայոց Ձորի մարզպետ Տրդատ Սարգսյանը հայտնել էր, որ ինքը մասնակցություն չի ունեցել դեպքին։ Այս գործով մարզպետի օգնականը կալանավորված է։

Սեպտեմբերի 24-ին մարզպետը հայտարարություն էր տարածել, ըստ որի՝ որոշում է կայացրել վայր դնել Վայոց Ձորի մարզպետի լիազորությունները՝ լայնածավալ ռազմավարական զորավարժությունների ավարտից հետո։

Զորավարժությունները մեկնարկել են սեպտեմբերի 24-ին և կավարտվեն հոկտեմբերի 5-ին։