Ձեր վստահելի աղբյուրը

Սահմանադրական դատարանի դատավոր Ալվինա Գյուլումյանը չի հիշում նախադեպ, որ ՍԴ որևէ դատավոր նիստերի չմասնակցի։ Այս մասին ասաց Ա. Գյուլումյանը՝ պատասխանելով հարցին, թե հայտնի է դարձել, որ ՍԴ դատավոր Վահե Գրիգորյանը չի մասնակցել ՍԴ որևէ նիստի, այդ թվում 10 դատաքննության՝ ոչ հարգելի,  կհիշե՞ք նման նախադեպ, ի՞նչ  գործընթաց է սպասվում։

Ա. Գյուլումյանն ասաց, որ առայժմ չի կարող ասել, թե ինչ գործընթաց է սպասվում, բայց իրավական  առումով «Սահմանադրական դատարանի» մասին օրենքի համաձայն ՍԴ դատավորները պարտավոր  են նիստերին մասնակցել, որոշակի ժամանակվա ընթացքում որոշակի քանակով նիստերին չմասնակցելը կարող է կարգապահական  պատասխանատվության հիմք հանդիսանալ։

Հարցին՝ այս պահին կարգապահական  պատասխանատվության ենթարկելու հիմք կա՞, նա պատասխանեց. «Կարգապահական պատասխանատվության համար կարող է գործընթացը սկսվել հենց Սահմանադրական դատարանում երեք  դատավորի  դիմումով։ Անձամբ ես չեմ նախաձեռնի նման բան։  Կախված է երևի դատավորներից»։

Հարցին, թե Վահե Գրիգորյանի հրապարակային առաջարկներից հետո ժամանակ է անցել, Ձեր գործըներոջ հետ քննարկում ունեցե՞լ եք, ՍԴ-ում նրա առաջարկները քննարկվե՞լ են, թե՞ ոչ, ՍԴ դատավորն ասաց. «Բնականաբար, դատավորները պետք է գոնե իրենց առօրյա զրույցներում դրան անդրադառնային, հնարավոր է, որ անդրադառնային։ Ես ընդհանրապես դեմ եմ՝ մինչև քննարկելը հանրային քննարկման առարկա դարձնելու ձևաչափին։

Կոնկերտ ինձ հետ քննարկել է մինչև դիմելը։ Բնականաբար, առաջարկվող տարբերակներից կամ դատավոր-անդամ բառախաղին դեմ պետք է լինեի։

Այլընտրանքն այն է, ինչ գործող Սահմանադրությունը։ Եթե կլինեն սահմանադրական փոփոխություններ, թող լինեն»։

Ա. Գյուլումյանն ասաց, որ ՍԴ-ում ճգնաժամ չկա, եթե լիներ՝ գործեր չէին քննի, որոշումներ չէին կայացնի, նիստերի համար քվորում չէին ապահովի։

«Բնականոն ընթացքով գնում են»,- ասաց Ա. Գյուլումյանը։

Կոկրետ հարցին՝ եթե վերանանք Հայաստանից, նորմա՞լ է, երբ իշխող կուսակցության ներկայացուցիչը գնում է ՍԴ, ընտրվում դատավոր, նա պատասխանեց, որ Գերմանիայում ՍԴ դատավորն ընդհուպ կարող է կուսակցական պատկանելության լինել, Հայաստանում դրվել է պարտադիր պայման, որ որևէ կուսակցության անդամ չպետք է լինի, ինչը ճիշտ է։