Ձեր վստահելի աղբյուրը

Այսօր Հայաստանում առաջին անգամ կհնչի Տիգրան Մանսուրյանի թավջութակի 4-րդ կոնցերտը: Անդրեյ Բորեյկոն, ով մեր ժամանակների լավագույն դիրիժորներից է, հատուկ ժամանել է Հայաստան Մանսուրյանի այս ստեղծագործությունը ղեկավարելու համար: Համերգը կանցնի Երևանյան 13-րդ միջազգային երաժշտական փառատոնի շրջանակներում և նվիրված է Տիգրան Մանսուրյանի 80-ամյա հոբելյանին: Կոնցերտը կհնչի Հայաստանի Ազգային ֆիլհարմոնիկ նվագախմբի կատարմամբ:

Հայաստանի Ազգային ֆիլհարմոնիկ նվագախմբի հաղորդմամբ, մենակատարը անվանի թավջութակահար Սևակ Ավանեսյանն է Բելգիայից, ով իր փայլուն տաղանդի շնորհիվ  հանդես է գալիս Եվրոպայի լավագույն նվագախմբերի ու դիրիժորների հետ:

Համերգի դիրիժոր Անդրեյ Բորեյկոն այսօր աշխարհի կարևորագույն դիրիժորներից է, բարձրակարգ պրոֆեսիոնալ, ով եղել է այնպիսի առաջատար նվագախմբերի գեղարվեստական ղեկավարը, ինչպիսիք են Համբուրգի սիմֆոնիկ, Դյուսելդորֆի սիմֆոնիկ, Պոզնանի ֆիլհարմոնիկ, Jenaer Philharmonie, Winnipeg Symphony և Բելգիայի ազգային նվագախմբերը: Ներկայումս Բորեյկոն Նեապոլի Ֆիլհարմոնիկ /ի/ Artis-Naples նվագախմբի գեղարվեստական ղեկավարն է: Նա վաղուց է ծանոթ Մանսուրյանի ստեղծագործություններին և առաջին անգամ Հայաստան է ժամանել հատուկ մաեստրոյի հոբելյանին մասնակցելուև նրա ստեղծագործությունը ներկայացնելու համար:

Մասուրյանն իր կոնցերտն այսպես է բնութագրում. «Թավջութակի համար գրված իմ կոնցերտը բաղկացած է երեք մասից՝ դանդաղ-արագ-դանդաղ սկզբունքով, որի ծրագրված համաշխարհային պրեմիերան պետք է կայանար ապրիլի 24-ին: Այն 1915թ-ի զոհերի հիշատակի օրն է համայն հայության համար, ինչը և բացատրվում է «Ուր՞ է Աբել եղբայր քո» (Ubi est Abel frater tuus?) վերնագրով: Այս հարցը արդիական է դառնում ամեն անգամ, երբ մարդկային ձեռքը բարձրանում է մարդու վրա: Ես մտադիր էի այս ստեղծագործությունը Ռեքվիեմի բնույթով ներկայացնել, և ինքս ինձ համար այն անվանել եմ “Kyrie eleison”(Կիրիյե Էլեյսոն), “Dies irae” (Զայրույթի օր) և “Lacrimosa” (Լակրիմոզա)»:

Կոնցերտի համաշխարհային պրեմիերան կայացել է 2010թ.-ի ապրիլի 24-ին, Քյոլնում, (մենակատար՝ Յան Ֆոգլեր,  դիրիժոր՝ Սեմյոն Բիչկով):

Սեպտեմբերի 27-ի համերգի առաջին բաժնում Հայաստանում առաջին անգամ կհնչի Մանսուրյանի թավջութակի կոնցերտը, երկրորդ բաժնում՝ Դվորժակի թիվ 9 «Նոր աշխարհ» սիմֆոնիան: