Ձեր վստահելի աղբյուրը

Քաղաքագետ Ստեփան Դանիելյանը գրում է.

«Նիկոլը, ուզի, թե չուզի, պետք է հրաժարական տա և տալու է՝ որքան ուշ, այնքան ավելի խորքային դեստրուկտիվ գործընթացներ կսկսվեն: Ինքը դատապարտված է: Դա չի նշանակում, որ Հայաստանում իշխանափոխություն պետք է տեղի ունենա: Իշխանությունը պատկանում է խորհրդարանին, այլ ոչ թե վարչապետին և նոր կառավարություն կազմելը չի նշանակում իշխանափոխություն: Դա խորհրդարանական կառավարման մոդել ունեցող երկրների համար բնականոն երևույթ է։

Նիկոլը դեստրուկտիվ անձ է ու հասարակությանը կոնսոլիդացնելու իր շանսը չօգտագործեց: Նա անհասկանալի է թե «Իմ Քայլը» ֆրակցիայի գործընկերների համար, որտեղ շատերի հետ արդեն կոնֆլիկտի մեջ է, թե ուժային կառույցների սպաների համար, թե դատական համակարգի համար, որն արդեն փլուզման ու հեղինակազրկման շեմին է, թե Արցախի համար, թե Հայաստանի հանրության մի զգալի հատվածի համար։

Նիկոլը անհասկանալի է նաև միջազգային հարթակներում։ Միջազգային գործընկերների համար նա հախուռն, առաջնայինը երկրորդականից չտարբերող անձի համբավ է ձեռք բերել, ինչպես նաև տարերային է ներքին քաղաքականությունում։

Մավրը իր գործը արել է, Մավրը պետք է հեռանա։

Մեզ այժմ պետք է հավասարակշռված անձ, ով կլինի կոնստրուկտիվ, դիալոգի մեջ մտնի հասարակության տարբեր շերտերի հետ, կլինի վստահելի ու զուսպ իր խոսքերում։

Այսպես, թե այնպես նա հեռանալու է ժամանակից շուտ ու որքան շուտ, այնքան լավ մեզ բոլորիս համար, հատկապես իր քաղաքական թիմի համար»։