Ձեր վստահելի աղբյուրը

Մայրաքաղաքում հասարակական տրանսպորտի վիճակն օր օրի վաթարանում է։ Աշխատանքային օրվա ավարտին կանգառներում բազմաթիվ քաղաքացիներ երկար սպասում են տրանսպորտին, դրանից հետո երթևեկում ճկված, կքած ու կռացած, երբեմն էլ մարմնի տարբեր մասերը միկրոավտոբուսների դռների պատուհաներից դուրս գցած։

Երևանի տրանսպորտի վիճակի, վատթարացման պատճառների, ծրագրերի մասին Panorama.am-ը հարցեր էր ուղղել քաղաքապետ Հայկ Մարությանին։ Երևանի քաղաքապետարանի աշխատակազմի տեղեկատվության և հասարակայնության հետ կապերի վարչությունից այսօր պատասխանել են հարցերին։

Panorama.am-Ինչպե՞ս եք գնահատում Երևանում հասարակական տրանսպորտի վիճակը։ Վերջին անգամ ե՞րբ եք օգտվել հասարակական տրանսպորտից՝ միկրոավտոբուսից կամ ավտոբուսից։
Քաղաքապետարան- Երևանի հասարակական տրանսպորտի վիճակը ներկայումս բավարար չէ և կան բազմաթիվ խնդիրներ, որոնց մասին երբևէ չենք խուսափել բարձրաձայնել: Քաղաքապետ Հայկ Մարությանը երբեմն օգտվում է հանրային տրանսպորտից, իսկ սովորաբար տանից քաղաքապետարան է գալիս հեծանվով:

Panorama.am - Վերջին մեկ տարվա ընթացքում, երբ Դուք եք ղեկավարում մայրաքաղաքը, ոլորտում որևէ փոփոխություն արվե՞լ է։ Եթե այո՝ ի՞նչ, եթե ոչ՝ ինչո՞ւ։ Կան մասնագետներ, որոնք տրանսպորտային կոլապս են կանխատեսում Երևանի համար։ Համաձա՞յն եք այդ կանխատեսումների հետ։ Ի՞նչ են ցույց տալիս քաղաքապետարանի մասնագետների ուսումնասիրությունների արդյունքները, եթե իհարկե եղել են նման ուսումնասիրություններ։
Քաղաքապետարան-Գույքագրվել է մայրաքաղաքի հասարակական տրանսպորտում ստեղծված իրավիճակը, հստակեցվել առկա հիմնախնդիրները և ձեռնարկվել են միջոցներ, մինչև նոր երթուղային ցանցի ներդրումը, առկա շարժակազմերով և միջոցներով ապահովելու մայրաքաղաքի բնակչության բավարար սպասարկումը և չխաթարելու կանոնավոր ուղևորափոխադրումների գործընթացը: Տեղի է ունեցել հանդիպում գործող երթուղիները սպասարկող ընկերությունների ղեկավարների հետ, որի ընթացքում առաջարկվել է միջանկյալ ներդրումներ անել գործող ցանցի մեջ, ինչպես նաև՝ դիտարկել նոր ցանցի գործարկմանը մասնակցության հնարավորությունը:

Panorama.am- Այս պահին, քանի՞ ընկերություն է հրաժարվել, քանի՞ ընկերություն է պատրաստվում հրաժարվել երթուղիներ սպասարկելուց։ Ո՞ր երթուղիներն են։ Չսպասարկվող երթուղիները չե՞ն գործելու, ինչպես եղավ օրինակ թիվ 56 ավտոբուսային երթուղու պարագայում։
Քաղաքապետարան -Վերջին մեկ տարվա ընթացքում Երևանի ներհամայնքային ավտոբուսային երթուղիների սպասարկումից հրաժարվել է 2 կազմակերպություն (երթուղիներ հ.հ.45, 56), 1 կազմակերպություն սնանկ է ճանաչվել (երթուղի հ.1) և միկրոավտոբուսային երթուղիների սպասարկումից հրաժարվել է 3 կազմակերպություն (երթուղիներ հ.հ.48, 18, 61), 3 կազմակերպություն սնանկ է ճանաչվել (երթուղիներ հ.հ.73, 7, 17): Նշված երթուղիներից ավտոբուսային հ.45 և միկրոավտոբուսային հ.18 երթուղիները ներկայումս սպասարկվում են այլ կազմակերպությունների կողմից: Առաջիկայում երթուղիների սպասարկումից հրաժարվող կամ սնանկ ճանաչված կազմակերպությունների վերաբերյալ  տեղեկատվություն առկա չէ:

Panorama.am- Ի դեպ, թիվ 56 ավտոբուսային երթուղու սպասարկումից հրաժարվելուց հետո Դուք խոստացաք, որ հետևողական կլինեք, որպեսզի թիվ 23 միկրոավտոբուսային երթուղին նորմալ սպասարկվի։ Այս պահին էլ այդ երթուղու միկրոավտոբուսները  գալիս են 30-50 րոպեն մեկ, գերբեռնված, առանց նստելու հնարավորության։ Հետևողական չե՞ք եղել, թե՞ այլ պատճառներ կան։
Քաղաքապետարան- Հաղթանակ թաղամասի տրանսպորտային սպասարկման հարցը մշտական հսկողության տակ է: Ներկա պահին շարժման միջակայքերի մեծ լինելը բացատրվում է երթուղու շարժակազմի քանակի նվազմամբ՝ կապված առանձին միկրոավտոբուսների անսարքությունների հետ: Քննարկվում են նաև հնարավոր տարբերակներ ևս մեկ երթուղու միջոցով, փորձնական կարգով, Հաղթանակ գյուղի սպասարկումը կազմակերպելու համար:

Panorama.am- Տրանսպորտային նոր ցանցի շահագործման վերաբերյալ անընդհատ նոր ժամկետներ են նշվում։ Այսօրվա՝ 2019 թ. սեպտեմբերի 23-ի դրությամբ, ե՞րբ է նախատեսվում շահագործման հանձնել մայրաքաղաքի տրանսպորտային նոր ցանցը, աշխատանքներն ի՞նչ փուլում են, ի՞նչ է արվել այս ուղղությամբ։
Քաղաքապետարան-Երևանի քաղաքապետը տարբեր առիթներով անդրադարձել է նոր երթուղային ցանցի ներդրման գործընթացին և նշել, որ այն նախատեսվում է իրականացնել առնվազն երկու տարվա ընթացքում:

Panorama.am -Մետրոյի նոր կայարանի կառուցման ուղղությամբ ի՞նչ քայլեր են արվել։
Քաղաքապետարան-Ներկայումս Երևանի քաղաքապետարանում քննարկվում են Երևանի մետրոպոլիտենի  նոր կայարանների և ճոպանային ուղևորատար տրանսպորտի կառուցման հնարավորությունները, ըստ այդմ էլ ընթանում են հանդիպումներ մասնագիտացված կազմակերպությունների, ինչպես նաև շահագրգիռ մարմինների հետ, նախապատրաստվում նյութեր, մշակվում ելակետային տվյալներ՝ առաջադրանք կազելու համար: Առավել մանրամասն տեղեկատվություն առաջիկայում կզետեղվի Երևանի քաղաքապետարանի www.yerevan.am պաշտոնական կայքում:

Panorama.am-Պարոն քաղաքապետ, Դուք սիրում եք հեծանվով աշխատանքի կամ էլ միջոցառումների գնալ։ Երևան քաղաքի Հաղթանակ թաղամասի մի քանի փողոցների երեխաներ զրկված են հեծանիվ վարելու հնարավորությունից, քանի որ չունեն ասֆալտապատված փողոց։ Մասնավորապես, խմբագրություն են դիմել նույն թաղամասի 13-րդ փողոցի բնակիչները։ Նշում են՝ երեխաները հեծանիվ քշելու համար ստիպված են հեծանիվները գրկած անցնել մի քանի հարյուր մետր, որպեսզի կարողանան անվտանգ վարել։ Քանի որ այժմ կազմվում է հաջորդ տարվա բյուջեի նախագիծը, բնակիչները հույս ունեն, որ իրենց փողոցի ասֆալտապատումն էլ ընդգրկված կլինի 2020-ի ծրագրերում։ Ո՞ր դեպքում է հնարավոր, որ նրանց խնդրանք-պահանջը չբավարարվի ու փողոցը մնա չասֆալտապատված, երեխաներն էլ զրկված մնան առողջ ապրելակերպի իրենց իրավունքից։
Քաղաքապետարան- «Հաղթանակ»  թաղամասի 13-րդ փողոցը 2020 թվականին  ասֆալտապատելու վերաբերյալ կետը ավագանու  առաջիկա նիստերից մեկի օրակարգ ներառելու միջնորդությամբ հանդես կգա Երևանի ավագանու «Իմ քայլը »  խմբակցության անդամ Հայկ Հովհաննիսյանը: