Ձեր վստահելի աղբյուրը

Ազատ ոճի ըմբշամարտի Հայաստանի հավաքականի գլխավոր մարզիչ Հաբեթնակ Կուրղինյանը լրագրողների հետ զրույցում ամփոփել է Անդրանիկ Հարոյանի անվան 3-րդ հուշամրցաշարի արդյունքները:

«Մրցաշարը նորմալ անցավ: Տղաները լավ մարզավիճակում էին: Ճիշտ է` ըմբիշների քանակի հետ խնդիր ունենք վերջին տարիներին՝ կապված երիտասարդ տարիքի մարզիկների բանակ զորակոչվելու հետ, բայց ունենք երիտասարդ և հեռանկարային մարզիկներ: Մինչև 23 տարեկանների աշխարհի առաջնությունից առաջ կային քաշային կարգեր, որտեղ հստակ չէր, թե ով կներկայացնի Հայաստանը, այս մրցաշարը տվեց այդ հարցի պատասխանը: Հավաքականի ամբողջական կազմը կհայտարարենք մոտ մեկ շաբաթից»,- ասել է նա:

Խոսելով Արսեն Հարությունյանի և Վազգեն Թևանյանի մասին՝ հավաքականի գլխավոր մարզիչը ասել է. «Նրանք արդեն հանգստացել են, Արսենը նաև բուժման կուրս է անցել, իսկ նրանց մասնակցությունը Մ-23 ԱԱ-ին պարզ կլինի հաջորդ շաբաթ»,- խոսքը եզրափակեց Կուրղինյանը:

Մինչև 23 տարեկանների ըմբշամարտի աշխարհի առաջնությունը կկայանա հոկտեմբերի 28-ից նոյեմբերի 3-ը՝ Հունգարիայի մայրաքաղաք Բուդապեշտում։