Ձեր վստահելի աղբյուրը

Բնապահպանության և ընդերքի տեսչական մարմինն առաջիկայում Ամուլսարում սկսելու է ստուգումներ։ Կառույցի ղեկավար Վիգեն Ավետիսյանն ասում է, որ տեսչական մարմինն այսօրվա դրությամբ չունի լաբորատոր սարքավորումներ, ստուգումների իրականացման ընթացքում, եթե լինեն հարցեր, հնարավորություն ունեն ուղարկել միջազգային փորձաքննությունների:

Panorama.am-ը դիմեց  Բնապահպանության և ընդերքի տեսչական մարմնին՝ պարզելու, թե ինչո՞ւ են ուզում դիմել արտասահմանյան  կենտրոններին և ավելի գումար ծախսել. «Չեք կարծում, որ Հայաստանում կան նման լաբորատորիաներ, կենտրոններ, օրինակ՝ ՀՀ ԳԱԱ Էկոլոգանոոսֆերային հետազոտությունների կենտրոնն իր մեծ հնարավորություններով և գիտնականներով»։

Այսօր ստացանք պատասխանը.  «ՀՀ բնապահպանության և ընդերքի տեսչական մարմինը չունի համապատասխան սարքավորումներով հագեցված լաբորատորիա, սակայն «Բնապահպանական վերահսկողության մասին» ՀՀ օրենքի 12-րդ հոդվածի, 1-ին մասի, թ) կետի համաձայն բնապահպանական պետական տեսուչն իրավունք ունի ստուգումների ընթացքում օրենսդրությամբ սահմանված կարգով ներգրավելու մասնագետների և փորձագետների։ Ստուգումների ընթացքում, ելնելով անհրաժեշտությունից, կհամագործակցվի Հայաստանի Հանրապետությունում գործող, փորձաքննություններ իրականացնող կազմակերպությունների հետ։ Հայաստանի Հանրապետության փորձագիտական կազմակերպություններում անհրաժեշտ փորձաքննությունն իրականացնելու անհնարինության դեպքում միջազգային փորձաքննություն իրականացնելու համար կքննարկվի միջազգային փորձաքննություն իրականացնող կազմակերպություններին դիմելու նպատակահարմարության հարցը»։