Ձեր վստահելի աղբյուրը

Քանի կար Երևանում աղբամանները քչություն էին անում, հիմա էլ, հավանաբար, շատ են,  շուռ են տալիս, իբր քաղաքացիները աղբ չթափեն դրանց մեջ։ Շուռ եկածները «Սանիթեք» ընկերության աղբադույլերն են, իսկ շուռ տվողները Երևանի քաղաքապետարանի Աղբահանության և սանմաքրման համայնքային հիմնարկի աշխատակիցները։

Բայց բանն այն է, որ շուռ են տալիս աղբով։
 
Քաղաքացիներին չի հետաքրքրում, որ քաղաքապետարանի և «Սանիթեքի» միջև չլուծված խնդիրներ կան, տեսնելով՝ քաղաքապետարանի տեղադրած նոր «կանաչ» աղբամանների կողքին շրջված «Սանիթեքի» աղբամանները  հարց է առաջանում՝ ինչո՞ւ այդ «աղբն» էլ չեն հավաքում։ Ավելին՝ ինչու է մաքրության ճանապարհը վերջապես բռնած քաղաքապետարանը ինքը աղբ ստեղծում։

Արդեն նայել չի լինում այս հոգեմաշ «Սանիթեք»-քաղաքապետարան հակամարտությանը, որ վաղուց դարձել է միայն իրենց անձնական խնդիրը։  Քաղաքապետարանից ևս մեկ անգամ փորձեցինք պարզել, թե ի վերջո ե՞րբ են հավաքվելու «Սանիթեքի» աղբամանները։ Երևանի քաղաքապետի մամուլի քարտուղար Հակոբ Կարապետյանը Panorama.am-ին նախ հիշեցրեց, որ մենք այդ հարցով արդեն դիմել ենք։ Մենք հիշեցինք, որ չենք ստացել պատասխան, թե՝ ինչու է քաղաքապետարանը աղտոտում առանց այն էլ չփայլող քաղաքը։

Ի վերջո պատասխանեցին, թե՝ ժամանակի հարց է՝  կան կազմակերպչական  հարցեր, ֆինանսական ծախսեր...։ 

Լուսանկարներում՝ օֆիսի պատուհանի տակ, 10։0 հօգուտ աղբի։