Ձեր վստահելի աղբյուրը

«Փոխգնդապետ Արա Մխիթարյանը դեռևս կոմայի մեջ է, վիճակը գնահատվում է ծայրահեղ ծանր, սակայն կայուն։  Հուսով ենք, որ կապաքինվի, մոտ օրերս  գիտակցականը կվերականգնվի», - լրագրողների հետ զրույցում ասաց ՊՆ կենտրոնական կլինիկական զինվորական հոսպիտալի պետի բուժգծով տեղակալ Կարեն Գրիգորյանը:

Նա նշեց, որ Ա. Մխիթարյանը գտնվում է արհեստական շնչառության պայմաններում՝ կոմայի մեջ:

«Քանի դեռ մենք բացասական տեղաշարժ չունենք, դա գնահատվում է դրական։ Հույս ունենք՝ մոտ օրերս նոր արդյունքներ կունենանք»,- ասաց Կ. Գրիգորյանը։

Հիշեցնենք, որ 2019թ. սեպտեմբերի 18-ին անգիտակից վիճակում «Եղեգնաձոր բժշկական կենտրոն» ՓԲԸ  է տեղափոխվել Շիրակի մարզի բնակիչ, ՀՀ ՊՆ զորամասի սպա Արա Մխիթարյանը, ով «գլխուղեղի աջ կիսագնդի միջին աստիճանի սալջարդ, աջ քունք-գագաթային, ճակատային բլթերի շրջանի սուբդորալ հեմատոմա՝ արտահայտված քունքտենտորյալ լատերալ դիսլոկացիայով»  նախնական ախտորոշմամբ նույն օրը տեղափոխվել է ՀՀ ՊՆ կենտրոնական կլինիկական հիվանդանոց: Ըստ բուժհիմնարկից ստացված տեղեկանքի՝ վերջինս ենթարկվել է շտապ վիրահատության, վիճակը գնահատվել է ծայրահեղ ծանր:

Այս դեպքով  հարուցված քրեական գործի շրջանակներում Վայոց ձորի մարզպետի օգնական Հարություն Գրիգորյանը կալանավորված է,  մեղադրանք է առաջադրվել դիտավորությամբ անձին ծանր մարմնական վնաս պատճառելու համար, ձերբակալված է Վայոց Ձորի մարզի բնակիչ Զավեն Գրիգորյանը առողջությանը դիտավորությամբ ծանր վնաս պատճառելու կասկածանքով։