«Արմենիա» ԲԿ-ում ծննդաբերած կինը փնտրում է նորածնի մարմինը
Սեպտեմբերի 24-ին Հանրապետական ծննդատանը ծննդաբերած Հայկուհի Խաչատրյանը մինչ օրս որևէ ինֆորմացիա չունի, որտեղ է իր նորածին երեխայի մարմինը։ Ծննդաբերելուց հետո նրան հայտնել են, որ երեխան մահացած է։ Երեխայի ծնողները պնդում են, որ հիվանդանոցում կեղծել են փաստաթղթերն ու նորածնի մահվան փաստը։ Ոչ մայրը, ոչ էլ ծնարանի մոտ սպասող հարազատները նորածնին այդպես էլ չեն տեսել։
«Հարգելի ընկերներ դեռ լուր չունեմ փոքրիկիս գտնվելու վայրից։ Բայց առանձնահատուկ շնորհակալություն եմ ուզում հայտնել Աննա Հակոբյանից, որ արձագանքեց իմ նամակին և հեռախոսազրույց ունեցանք։ Նա էլ իր հերթին հետևողական կլինի բացահայտմանը...
Ընթացիկ լուրերի մասին կտեղեկացնեմ»,-այսօր նման գրառում է կատարել Հայկուհի Խաչատրյանը։
Ոստիկանությունից Panorama.am-ին հայտնեցին, որ դեպքի վերաբերյալ հրապարակման հիման վրա Մաշտոցի բաժնում հարուցվել է քրեական գործ՝ Քրեական օրենսգրքի 130 հոդվածի 2-րդ մասի հատկանիշներով։
Հոդվածը սահմանում է. «Բուժաշխատողի մասնագիտական, ինչպես նաև ոչ մասնագիտական օժանդակող գործունեությանը խոչընդոտելը, որը կատարվել է նրա նկատմամբ կյանքի կամ առողջության համար վտանգավոր բռնություն գործադրելով կամ դա գործադրելու սպառնալիքով` պատժվում է կալանքով` մեկից երկու ամիս ժամկետով, կամ ազատազրկմամբ` երկուսից հինգ տարի ժամկետով»։
«Այս պահին ոստիկանության բաժնում նախաքննություն է իրականացվում»,-ասացին հասարակայնության հետ կապերի և լրատվության վարչությունից։
Ոստիկանությունից նաև ասացին, որ նորածնի մարմնի դատաբժշկական փորձաքննություն նշանակվել է դեպքի հենց առաջին օրը, իսկ Երևանում նման փորձաքննություն իրականացվում է մի կենտրոնում՝ Դատաբժշկական փորձաքննությունների կենտրոնում։
Մայրը տարբեր հարցազրույցներում պնդել է, որ Երևանի 3 դատաբժշկական կենտրոններ են զանգահարել, ասել են՝ նման մարմին չեն ստացել։ Երեկ Հայկուհի Խաչատրյանը ֆեյսբուքյան իր էջում տեղեկացրել էր, որ նախորդ օրը կրկին հանցագործության մասին հաղորդում է ներկայացրել ոստիկանություն։
«Հաղորդում եմ տվել լրացուցիչ նյութերով, բացահայտած կեղծ փաստաթղթերի մասին և տեղեկացրել եմ, որ սիստեմայի մեջ իբոպրոֆեն են ներարկել և հաճախ կրկնում էինք ընթացքում քնի հենց ցավ լինի ուժ տուր։ Ես իմ կյանքում երբեք դեղորայք չեմ օգտագործել և Աստծո կամոք նրանց դեղով չեմ քնել ու մահացել։ Միայն երեխայիս տարան ու հավաստիացրեցին, որ ուղարկվելու է Իսակովի դատափորձաքննական լաբորատորիա, և պատասխանը կգա հոկտեմբերի 10- ին։ Հիվանդանոցում ինձ ցավազրկման և դեղերի ազդեցության տակ էին պահում։ Եթե ես հենց առաջին օրը իմանայի լաբորատորիա չեն տարել, ավելի շուտ կպայքարեի։ Ինչևէ ... Պահանջել եմ ԴՆԹ ցանկացած դեպքում, մարմնի փորձաքննության և գինեկոլոգիական միջամտությունների անալիզ և սպասում եմ պատկան մարմինների արձագանքին։ Ի դեպ նշեմ, որ առողջապահության նախարարության թեժ գծի հեռախոսահամարով տեղեկացանք, որ մասնավոր կլինիկա է, առողջապահության նախարարության հետ գործ չունի, որը ևս ինձ շատ վրդովվեցրեց»։
Ի դեպ, Հայկուհին պնդում է, որ հիվանդանոցում բժշկուհի Քեհյանն իրեն մեկ մլն դրամ է առաջարկել։
«Ես շատ վիրավորվեցի ու պատասխանեցի, իմ երեխայի միսն եք ինձ կերցնո՞ւմ։ Ես չեմ վաճառում իմ երեխային։ Նա էլ՝ թե դու էլ, ամուսինդ էլ շատ հպարտ էք։ Ասեցի գումար ստեղծողը մենք ենք, մեր արժանապատվությանը մի կպեք։ Ավելին ես ՀՀ քաղաքացի չեմ և ես ՀՀ- ից գումար չէի էլ ստանալու։ Մեզ լռեցնելու համար հանցավոր համաձայնության էին ուզում գալ, իսկ ես դա դեռ չէի հասկանում»,-մասնավորապես գրել է նա։
Լրահոս
Տեսանյութեր
Առնվազն երկու կողմ կա, ովքեր չէին ցանկանա, որ ԵԱՏՄ նիստը Հայաստանում անցկացվեր. Արթուր Խաչատրյան
