Ձեր վստահելի աղբյուրը

Կառավարությունը հավանություն է տվել «Պետական տուրքի մասին» օրենքում փոփոխություն և լրացում կատարելու մասին», «Իրավաբանական անձանց պետական գրանցման, իրավաբանական անձանց առանձնացված ստորաբաժանումների, հիմնարկների և անհատ ձեռնարկատերերի պետական հաշվառման մասին» օրենքում լրացումներ կատարելու մասին» և «Զանգվածային լրատվության մասին» օրենքում լրացում կատարելու մասին» ՀՀ օրենքների նախագծերի փաթեթին:

ՀՀ արդարադատության նախարար Ռուստամ Բադասյանն ասաց, որ այն արտոնություն է սահմանում լրատվական գործունեություն իրականացնող իրավաբանական անձանց և անհատ ձեռնարկատերերի համար՝ իրավաբանական անձանց պետական ռեգիստրի գործակալության գրանցամատյանում առկա տեղեկությունները ստանալիս։

Նշված արտոնությունը կայանում է նրանում, որ նախագծերի փաթեթով սահմանված կարգով իրավաբանական անձանց պետական ռեգիստրի գործակալությանը հայտ ներկայացրած լրատվական գործունեություն իրականացնող իրավաբանական անձանց և անհատ ձեռնարկատերերին կտրամադրվի իրավաբանական անձանց Պետական ռեգիստրի գործակալության գրանցամատյանում առկա տեղեկատվությունն անվճար ստանալու հնարավորություն։

Նախարարը նշեց, որ ներկայումս լրատվական գործունեություն իրականացնողները իրավաբանական անձանց պետական ռեգիստրի գործակալության գրանցամատյանից տեղեկատվություն ստանալու համար վճարում են պետական տուրք։

Նախագծերի փաթեթով նաև ընդլայնվել է «զանգվածային լրատվության միջոց» եզրույթի հասկացությունը՝ դրանում ընդգրկելով համացանցային կայքերի միջոցով լրատվական գործունեություն իրականացնողներին։

«Անվճար տեղեկության տրամադրման որևէ սահմանափակում չենք նախատեսել, տեղեկության ծավալը չենք սահմանափակել էջերով, սահմանվել է լրատվական գործունեություն իրականացնող իրավաբանական անձանց և անհատ ձեռնարկատերերին իրավաբանական անձանց պետական ռեգիստրի գործակալության գրանցամատյանում առկա տեղեկություններին հասանելիություն տալու կարգը՝ այդպիսով նախատեսելով առավել լայն երաշխիքներ ազատ մամուլի զարգացման համար»,- ասաց արդարադատության նախարարը։

Նախագծի հիմնավորման համաձայն, լրատվական գործունեություն իրականացնող իրավաբանական անձանց ու անհատ ձեռնարկատերերի համար նման հնարավորության նախատեսումը կամրապնդի հետաքննող լրագրության և ընդհանրապես մամուլի ազատության երաշխիքները, կնպաստի նրանց կողմից հանրությանն առավել ճշգրիտ և համապարփակ տեղեկատվություն տրամադրելուն:

Ըստ հիմնավորման՝ լրատվական գործունեություն իրականացնողը, որը ցանկանում է ստանալ հասանելիություն պետական միասնական գրանցամատյանում առկա տեղեկություններին՝ առանց պետական տուրքի վճարման, պետք է գործակալություն ներկայացնի համապատասխան հայտ, որում պետք է նշի զանգվածային լրատվության միջոցի անվանումը, լրատվական գործունեություն իրականացնող իրավաբանական անձի լրիվ անվանումը, իրավաբանական անձի պետական գրանցման համարը, գտնվելու վայրը, իսկ եթե լրատվական գործունեություն իրականացնողը անհատ ձեռնարկատեր է, ապա նրա անունը, ազգանունը, հաշվառման, ինչպես նաև լրատվական գործունեության իրականացման հասցեն և պետական հաշվառման համարը։

Ռուստամ Բադասյանն ասաց, որ նախագիծը e-draft-ում տեղադրելուց հետո բուռն արձագանք է  առաջացրել լրատվամիջոցների շրջանում, որոնք իրենց անհանգստություն էին հայտնում, թե  նախագծով փորձ է արվում վերահսկել լրատվամիջոցներին. «Ժամանակը ցույց տվեց, որ նման նպատակ ամենևին չենք ունեցել։ Նպատակը մեկն էր՝ անվճար տեղեկություն տրամադրել ռեգիստից»։ 

Վարչապետ Նիկոլ Փաշինյանն էլ արձագանքեց. «Մոտ մեկ տարի է լրագրողները դիմում են մեզ, որ այս խնդիրը լուծենք, հիմա երբ լուծեցինք, սկսեցին աղմուկ անե՞լ: Եթե չեն ուզում, կարող ենք չընդունել։ Իրենց խնդրանքով ենք այս փոփոխությունն անում։ Այսինքն՝ մենք տվյալների բազային մուտք ենք տալիս լրատվամիջոցներին, և մեզ մեղադրում են նրա համար, որ մենք ուզում ենք լրատվամիջոցներին վերահսկե՞նք: Տալիս ենք մուտքի հնարավորություն, ասում ենք մտնելուց առաջ պետք է ID քարտ օգտագործեք, ասում են՝ ո՞նց, մեզ ուզում եք վերահսկե՞ք»:

Վարչապետը  հետաքրքրվեց`  պետռեգիստրում նշվելո՞ւ է, թե ովքեր են լրատվամիջոցների սեփականատերերը և անմիջապես ասաց. «Լավ  չի, լավ չի: Հեսա կասեն, որ ուզում ենք վերահսկել լրատվամիջոցներին, քանի որ ուզում ենք պարզել, թե ովքեր են սեփականատերերը»: