Ձեր վստահելի աղբյուրը

Լրացավ սաուդցի լրագրող Ջամալ Խաշոգիի սպանության մեկ տարին։ 2018թ.-ի հոկտեմբերի 2-ին ԱՄՆ-ում մշտական բնակություն հաստատած Խաշոգին, Թուրքիա կատարած այցի ժամանակ մտավ Սաուդյան Արաբիայի հյուպատոսարան՝ վերցնելու ամուսնանալու համար անհրաժեշտ փաստաթղթեր, որտեղից այլևս դուրս չեկավ։ Այս մասին գրում է euronews-ը։

Երեկ՝ Խաշոգիի սպանության տարելիցին Թուրքիայում Սաուդյան Արաբիայի հյուպատոսության մոտ տեղի ունեցավ հիշատակի միջոցառում ու բացվեց Խաշոգիին նվիրված  հուշաքար։ Միջոցառումը մեկնարկեց տեղի ժամանակով 13.14-ին՝ նույն ժամին, երբ Խաշոգին մտել էր հյուպատոսարան, որից հետո Սաուդյան Արաբիայի իշխանությունները հայտարարեցին, որ Խաշոգին սպանվել է կոնֆլիկտի արդյունքում։

«Այժմ, իմ կյանքի ամենավատ մեկ տարուց հետո, ես կանգնած եմ այստեղ կոտրված, բայց հպարտ: Հպարտ եմ, որ տեսնում եմ բոլորիդ այստեղ, և ձեզ հետ ես դեռ արդարություն եմ փնտրում: Ես ուզում եմ իմանալ, թե ինչ է պատահել նրա մարմնի հետ: Ես ուզում եմ, որպեսզի նրա ընկերները ազատվեն բանտից », - միջոցառմանը հայտարարել է սպանված լրագրողի հարսնացու Հաթիս Քենգիզը:

Խաշոգին հայտնի էր Ռիյադի քաղաքականության վերաբերյալ քննադատական հոդվածներով և 2017 թվականից բնակվում էր Միացյալ Նահանգներում, որտեղ նա հոդվածներ էր գրում  Washington Post-ի համար: Թուրքական և ամերիկյան հետախուզական գործակալությունները կարծում են, որ Սաուդյան Արաբիայի բարձրագույն ղեկավարությունը, մասնավորապես թագաժառանգ Մուհամմադ բին Սալմանը, կարող է ներգրավված լինել այդ սպանության մեջ:

Հունիսին ՄԱԿ-ին ներկայացրած հատուկ զեկույցի եզրակացության համաձայն՝ Սաուդյան Արաբիան մեղավոր է Խաշոգիի «կանխամտածված սպանության» մեջ և սաուդցի թագաժառանգ Մուհամմադ բին Սալմանը պետք է պատասխանատվության ենթարկվի:  Նախորդ տարվա դեկտեմբերին ԱՄՆ Սենատի միաձայն որոշմամբ ևս Խաշոգիի սպանության մեջ մեղավոր ճանաչվեց թագաժառանգ Մուհամմադ բին Սալմանը, սակայն Թրամփն իր ելույթում պաշտպանեց թագաժառանգին՝ կարևորելով ԱՄՆ-Սաուդյան Արաբիա հարաբերությունները: Ռիյադում այս մեղադրանքները մերժվում են:

Սաուդյան Արաբիայի 11 կասկածյալներ շուտով դատարանի առջև կկանգնեն, որոնցից  5-ը, հավանաբար, մահապատժի կենթարկվեն:

Հիշեցնենք, որ լրագրողի անհետացումից հետո տեղեկություններ տարածվեցին, որ Խաշոգիին հյուպատոսարանում տանջամահ են արել, մարմինը մասնատել։ Միջադեպից հետո փողոցում տեղադրված տեսախցիկներն արձանագրել էին, թե ինչպես են հյուպատոսությունից դուրս գալիս ճամպրուկներով մարդիկ։ Ենթադրվում էր, որ ճամպրուկներում Խաշոգի մարմինն է եղել։