Ավտոներկրողների բողոքը. «Այս նոր կադրերը շատ բան չեն հասկանում»
Ավտոներկրողներն այսօր բողոքի ակցիա իրականացրեցին կառավարության շենքի դիմաց։ Նրանց պահանջն է 2020 թ.-ի հունվարի 1-ից հետո երկու ամսով երկարաձգել մեքենաները ներկայիս մաքսային գներով մաքսազերծելու համար:
Նրանք նաև այլ պահանջ և բողոք ունեն։ Ավտոներկրողներից մեկն ասաց. «Գիտեք, թե ինչ քանակությամբ մեքենա է մտնել ու մտնում Հայաստան։ Ահռելի մասը դուրս է հանվում, գնում են օտարերկրյա քաղաքացիները։ Ի՞նչ մեխանիզմով. այստեղ ժամանավոր կացություն են ստանում, հայկական համարով իրենց անունով մեքենան տանում են իրենց մոտ։ Սեպտեմբերի 26-ին կառավարությունը որոշում է կայացրել, որ ժամանակավոր կացությունը չեղարկեն, պարտադրեն հիմնական կացություն ունել, ինչը բարդ մեխանիզմ է, երկար ժամանակ է տևելու, ամեն մարդու կարող է չտրամադրեն։ Այսինքն ստացվում է, որ օտարերկրյա քաղաքացիաները չեն գան այստեղից մեքենա գնեն։ Դա նշանակում է, որ եթե օտարերկրյա քաղաքացիները չգան այստեղից մեքենա գնեն, մեքենայի ահռելի մասսան Հայաստանի համար ուղղակի կդառնա գերեզմանոց»։ Նրանք նշում են, որ արդեն նկատվել է օտարերկրացի գնորդների հոսքի նվազում։
Խնդիր են համարում մաքսատունը Գյումրի տեղափոխելը, նաև մեծ հերթերի կուտակումները։ Բողոքողները նշում են, որ իրենք ներկայացրել են հերթերի խնդրի լուծման ճանապարհ։
Ավտոներկրողների միության նախագահ Տիգրան Հովհաննիսյանը կառավարությունում վարչապետի օգնական Նաիրի Սարգսյանի հետ հանդիպումից հետո հայտարարեց, որ մինչև հուլիսի 1-ը կարող են վաճառել մեքենաները հին կարգով։ Գյումրու մաքսատունը դեռ այս տարվա ընթացքում չի բացվի, պատրաստ չէ։ Ինչ վերաբերում է մաքսազերծման արտոնության 2 ամսով երկարաձգելուն, որպեսզի բոլոր մեքենաները հասցնեն բեռնաթափեն, նա նշեց, որ մեկ շաբաթ անց կրկին հանդիպելու են, քանի որ ժամանակ է անհրաժեշտ խնդրին լուծում գտնելու համար։ Նա ասաց, որ մյուս խնդիրներին կանդրադառնան մյուս հանդիպմանը։
«Այս նոր կադրերը շատ բան չեն հասկանում, բացարձակ չեն տիրապետում իրավիճակին, որովհետև որևէ մեկը չի եկել ավտոշուկա ժողովրդի հետ խոսելու ու խնդիրները հասկանալու համար: Մենակ խոսում են՝ չես բերելու, տար վրացիքին ծախի: Ասում եմ՝ այս ձմեռվա շեմին, այդքան երթևեկության պատճառով քանի՞ մարդ է զոհվում Հայաստանում, հիմա էլ Գյումրու ճամփեքին զոհվենք: Ասում է՝ հա ինչ անենք, այնքան մարդ է զոհվում: Այս մարդիկ ենթակա են վարչապետին, հենց ՊԵԿ-ի մաքսային ղեկավարները, հենց ճանապարհային ոստիկանապետի կողքը։ Ասում են՝ փող չունե՞ք գնաք Գյումրի։ Բայց դու ով ես, որ իմ փողերը հաշվում ես»,- նշեց Տիգրան Հովհաննիսյանը:
Բողոքող ավտոներկրողները կրկին հավաքվելու են մեկ շաբաթից՝ մյուս խնդիրներին լուծումներ ստանալու համար։
Հարակից հրապարակումներ`
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
