Ձեր վստահելի աղբյուրը

Շուտով Փարիզից Հայաստան  կժամանի հայկական, ռուսական և ֆրանսիական արմատներ ունեցող հայտնի դերասանուհի Տատյանա Սպիվակովան, hատուկ  Ջիվան Ավետիսյանի «Դրախտի դարպասը» ֆիլմի պրեմիերային ներկա գտնվելու համար։ Այս մասին Panorama.am-ին տեղեկացրեցին  «Դրախտի դարպասը» ֆիլմի թիմից։ 

Ֆիլմում  Տատյանան մարմնավորել է գլխավոր հերոսուհուն՝ Սոֆիա Մարտիին։ Տատյանա Սպիվակովան ծնվել է Մոսկվայում, մեծացել՝ Իսպանիայում, ներկայումս ապրում և իր դերասանական կարիերան է կառուցում Փարիզում: Խաղացել է եվրոպական բազմաթիվ բեմերում, մասնակցել է ֆրանսիական Ավինյոն, Բրատիսլավայի Istropolitana European, Մեծ Բրիտանիայի Լիվերպուլ քաղաքի Physical Fest-երին: Աշխատել է հեղինակավոր բրիտանացի ռեժիսոր Ուիլիամ Օլդրոյդի հետ, խաղացել ռեժիսորներ Մաքսիմ Ռոյի և Ջերեմի Տրեքուեսսերի համատեղ առաջին խաղարկային  ֆիլմում՝ Même Pas Mal-ում։

Սպիվակովայի հայրը՝ Վլադիմիր Սպիվակովը,  Ռուսաստանի ազգային ֆիլհարմոնիկ  նվագախմբի
գեղարվեստական ղեկավարն ու գլխավոր դիրիժորն է: Իսկ մայրը՝ հայտնի  հեռուստահաղորդավարուհի և դերասանուհի Սաթի Սպիվակովան է:

Ֆիլմի ֆեյսբուքյան էջից տեղեկանում ենք, որ  2019-ի հոկտեմբերի 17-ին «Դրախտի դարպասը» ֆիլմի պրեմիերան կլինի Երևանում։ 

Ֆիլմի մասին. Գերմանացի լրագրող Ռոբերտ Ստերնվալը (50 տարեկան)  2016թ․-ին վերադառնում է Արցախ՝ լուսաբանելու քսաներկու տարվա ընդմիջումից հետո վերսկսված պատերազմը։ Լրագրողական հետաքննության արդյունքում ծանոթանում է երիտասարդ օպերային երգչուհի Սոֆիա Մարտիի  (35 տարեկան) հետ։ Ռոբերտի և Սոֆիայի հաճախակի հանդիպումները արթնացնում են փոխադարձ սիրո զգացմունքը, սակայն պարզվում է, որ Սոֆիան անհայտ կորած ֆոտոլրագրող Էդգար Մարտիրոսյանի աղջիկն է, ում 1992թ․ին՝ Թալիշի անկման օրը, Ռոբերտը թողել է գյուղում՝ գերեվարության մեջ, ապա  յուրացրել նրա՝ մարտի դաշտում արված լուսանկարները...

Ֆիլմի գլխավոր օպերատորը լիտվացի Ռիտիս Կուրկուլիսն է։ «Դրախտի դարպասը» ֆիլմում օպերային երգիչ Ժան Բեռնարի կերպարը մարմնավորում է լիտվացի հայտնի դերասան Լեո Պոբեդոնոսցևասը:

«Դրախտի դարպասը»  Հայաստան, Լիտվա, Ֆինլանդիա, Ֆրանսիա համատեղ արտադրության ֆիլմ է։