Ձեր վստահելի աղբյուրը

Խոսրովի արգելոցը վերջերս տոնեց  61-ամյակը: Այն  աշխարհում իր տեսակի մեջ չկրկնվող  տարածք է՝ հարուստ կենսաբազմազանությամբ և բացառիկ լանդշաֆտով:  Սակայն մինչ օրս արգելոցը  չունի  կադաստրային քարտեղ, սահմանագծված  տարածք: Տարիներ շարունակ չարչրկված խնդիրը հնարավոր է առաջիկայում լուծում ստանա:

Խոսրովի արգելոցի տնօրեն Հրաչյա Հովակիմյանը «Panorama.am»-ի հետ զրույցում նշեց, որ ՇՄ նախարարի առաջադրանքով մշակվել է նախագիծ, որով հստակեցված են արգելոցի սահմանները:

Նշենք, որ արգելոցի տարածքում  կա բնակեցված գյուղ՝  Գիլանը կամ Գիլանլարը, շուրջ  30 տնտեսությամբ: Մարդիկ այստեղ եկել են 1950թ.-ին:  Բնակիչները երբևէ սեփականության իրավունք չեն ունեցել, քանի որ «Բնության հատուկ պահպանվող տարածքների  մասին» ՀՀ օրենքի   համաձայն՝  հատուկ պահպանվող տարածքները սեփականացման  ենթակա  չեն: Այդուհանդերձ շարունակում  են ապրել , զբաղվել  գյուղատնտեսությամբ ու անասնապահությամբ:

Հարցին, թե ինչպե՞ս է լուծվելու արգելոցի տարածքում  գտնվող Գիլան գյուղի բնակիչների խնդիրը, Հովակիմյանը պատասխանեց.

- Այնտեղ միայն Գիլանլարի խնդիրն է, քանի որ միայն այս գյուղն է բնակեցված:  Պետք է նշենք, որ  ապրողները բոլորն այլ տեղերում սեփականություն ունեն, տներ ունեն: Գիլանում ոչ ոք գրանցված չէ, ուղղակի ապրում են՝ հիմնականում ամռանը: Այդ տարածքում նախկինում ոչխարաբուծական  ֆերմա է եղել, եկել են  ու մնացել:

-Իսկ  նոր նախագծով ի՞նչ է նախատեսված, գյուղի բնակիչները պետք է լքեն տարածքը, թե  սեփականաշնորհման թույլտվություն կտրվի.

- Նախագծով երկու տարբերակ է նախատեսված՝  կամ պետք է փոխհատուցում  տալ և լքեն տարածքը, կամ էլ  այդ  տարածքը  արգելոցի կարգավիճակից  փոխվի արգելավայրի և բնակիչների հետ պայմանագիր կնքվի ՝ թույլ տալ ապրելու և տուրիզմը զարգացնելու պայմանով: Այս ամենը դեռևս քննարկվում է:

Թե երբ վերջնականապես  կլուծվի սահմանային քարտեզագրման խնդիրը, Հովակիմյանը վստահեցրեց, որ առաջիկայում արդեն գործնական քայլերի կանցնեն:

Խոսրովի արգելոցի տնօրենն ընդգծեց. «ՇՄ նախարարը հստակ հանձնարարություն է տվել  մոնիթորինգի ծառայությանը , նաև  գրություն է  ուղարկվել կադաստրային կոմիտե, արգելոցի աշխատակազմն էլ իր հերթին աշխատանքներ է տանում այս ուղղությամբ: Արդյունքները պատրաստ լինելուն պես  կներկայացնենք նոր կառավարման պլանի հետ հաստատման: Խոսրովը մինչ օրս կադաստրային քարտեզ չունի, սա էլ է լուրջ խնդիր, և հիմա  կա հնարավորություն քարտեզագրման աշխատանքների հետ այս հարցն էլ լուծել»: