Ձեր վստահելի աղբյուրը

Այսօր մի խումբ անձիք՝ Հայկ Ստեփանյանը, Դավիթ Հովհաննիսյանը, Արտակ Մարգարյանն ու Սարգիս Մանուկյանը հարձակվել են ընդդմադիր Hayelia.am լրատվամիջոցի և «Հայելի» մամուլի ակումբի խմբագրության վրա:

Որպես ընդդիմադիր լրատվամիջոցի վրա հարձակման պատճառ՝ այս խումբը ներկայացրել է լրատվամիջոցում Ադրբեջանի նախագահի հայտարարության լուսաբանման փաստը՝ վերնագրված « «Ալիևի ուշացած, բայց հուժկու պատասխանը Փաշինյանին»։

Այս նույն խումբը 2019թ.-ի սեպտեմբերի 25-ին Ազատության հրապարակում հավաք էր կազմակերպել ի աջակցություն ՀՀ վարչապետ Նիկոլ Փաշինյանի: Նրանք զուգահեռաբար մի շարք ակցիաներ են իրականացրել ընդդեմ Հայաստանի երկրորդ նախագահ Ռոբերտ Քոչարյանի:

Նրանք սոցցանցի իրենց էջերում ևս հանդես են գալիս ՀՀ վարչապետին և նրա կառավարությանն աջակցող և ընդդիմախոսներին վարկաբեկելու դիրքերից:

Հիշեցնենք՝  Անժելա Թովմասյանը հարազատ քույրն է ՍԴ նախագահ Հրայր Թովմասյանի, ում լիազորությունները դադարեցնելու համար իշխանությունը ջանք չի խնայում։ ԱԺ-ն ընդունել է համապատասխան նախագիծ և ուղարկել ՍԴ:

Ուշագրավ է, որ ընդդիմադիր լրատվամիջոցի խմբագրության վրա հարձակված անձիք խմբագրության պատին ամրացրել են նաև Հրայր Թովմասյանի լուսանկարը: Նրանցից մեկն էլ հրապարակված տեսանյութում հայտարարում է. «Հրայր Թովմասյանի քույրը՝ Անժելա Թովմասյանն իրավունք չունի ընդհանրապես որևէ գործունեություն ծավալի Հայաստանում»:

Հավելենք, որ համաձայն մամուլի հրապարակումների, իշխանության պահանջով «Կենտրոն» հեռուստաընկերությունը դադարեցրել է Hayeli.am կայքի խմբագիր Անժելա Թովմասյանի «Հայելու առաջ» հեղինակային հաղորդման հեռարձակումը: Հաղորդումը շուրջ մեկ շաբաթ է՝ չի հեռարձակվում:

Հայաստանում ընդդիմադիր լրատվամիջոցի նկատմամբ իշխանության աջակիցների հարձակման այս դեպքն աննխադեպ է: Թե ինչ հետևանքներ կունենա այս գործողությունը, կներկայացնենք առաջիկայում: