Ձեր վստահելի աղբյուրը

Երևանի ընդհանուր իրավասության դատարանի Շենգավիթի նստավայրում շարունակվում է ՀՀ երկրորդ նախագահ Ռոբերտ Քոչարյանի և մյուսների գործով դատական նիստը։ Ինչպես նախորդ նիստերի ժամանակ, այս անգամ էլ դատարանի բակում հավաքված են մեծ թվով քաղաքացիներ, որոնց մի մասը պահանջում է անհապաղ ազատ արձակել Ռոբերտ Քոչարյանին, մյուս մասը դեմ է երկրորդ նախագահի ազատմանը։

Քոչարյանի աջակիցներից փաստաբան Վահե Եփրիկյանն ընթերցեց հասարակական, քաղաքական, մշակույթի, սպորտի մի քանի տասնյակ գործիչների հայտարարությունը  ՀՀ երկրորդ նախագահի  խափանման միջոցը փոխելու վերաբերյալ։

Ռ. Քոչարյանի աջակից Գագիկ Բաղդասարյանն ասաց, որ Հայաստանում դատական համակարգը պարազիլացված վիճակում է, ամբողջ աշխարհաքաղաքական իրադարձությունները ցույց են տալիս, որ պետության ղեկավարները երկիրը տանում են առճակատման։

«Դրա արդյունքում և հետևանքն այն է, որ Հայաստանում սկսվել են ռեպրեսիաներ այն մարդկանց նկատմամբ, ովքեր փորձում են պայքարել հանուն ազատության և արդարության։ Մեր պայքարը միանշանակ միտված է  մեր երկրում  արդարությանը, պահանջում ենք դատարանից և բոլոր իրավակիրառներից, ովքեր հոդվածներ են շռայլում աջ ու ձախ, իրականացնում են իշխանությունների կամքն՝ անօրինական ու հակասահամանադրական»,- նշեց Գ. Բաղդասարյանը։