Ձեր վստահելի աղբյուրը

Հոկտեմբերի 9-12-ը Երևանում կանցկացվի «Պորտուգալական կինոյի օրեր» միջոցառումը: «Մոսկվա» կինոթատրոնում՝ հոկտեմբերի 9-ին (ժամը 19:30) տեղի կունենա պորտուգալական կինոյի օրերի բացման պաշտոնական արարողությունը, որին կհաջորդի «Զևս» (ռեժ. Պաուլու Ֆիլիպ Մոնտեյրու) ֆիլմի ցուցադրությունը:

Ֆիլմի հերոսը քսաներորդ դարի պորտուգալացի գրող Մանուել Թեյքսիրա Գոմեսն է, որը դարձավ երկրի նախագահ:

Հայաստանի ազգային կինոկենտրոնի ֆեյսբուքյան էջից տեղեկանում ենք, որ միջոցառման ծրագիրը ներառում է 5 լիամետրաժ ֆիլմ Պորտուգալիայի պատմության և ժամանակակից կյանքի մասին («Զևս» ռեժ. Պաուլու Ֆիլիպ Մոնտեյրու, «Մայրը ավելի լավ գիտի» ռեժ. Նունու Պոշա, «Ուխտագնացություն» ռեժ. Ժուաու Բուտելիու, «Բեռ» ռեժ. Բրունու Գասկոն, «Կինոն, Մանուել դը Օլիվեյրան և ես» ռեժ. Ժուաու Բուտելիու) և «Պորտուգալիան՝ կարճամետրաժում» խորագրով 5 ֆիլմ (կարճամետրաժների հավաքածու)։

Հանդիսատեսը հնարավորություն կունենա ծանոթանալու պորտուգալական կինոյի բացառիկ նմուշներին, ինչպես նաև հնարավորություն կունենա բացահայտելու Պորտուգալիան՝ որպես երկիր, մշակույթ և սոցիում:

Միջոցառման կազմակերպիչ Հայաստանի ազգային կինոկենտրոնն է,  Պորտուգալիա-Հայաստան Բարեկամության միության նախաձեռնությամբ։