Ձեր վստահելի աղբյուրը

«Գտնում ենք, որ Արմեն Գևորգյանի նկատմամբ  խափանման միջոց ստորագրություն չհեռանալու մասին պետք է վերացվի, որովհետև ի սկզբանե վարույթն իրականացնող մարմնի որոշումը եղել է ապօրինի»,-ընթացող դատական նիստում նման միջնորդություն ներկայացրեց ՀՀ նախագահի աշխատակազմի նախկին ղեկավար Արմեն Գևորգյանի փաստաբան Էրիկ Ալեքսանյանը։

Պաշտպանն ընդգծեց, որ այդ որոշմամբ անհարկի սահմանփակվել է Արմեն Գևորգյանի ազատ տեղաշարժի իրավունքը։

Ալեքսանյանի խոսքով, ուսումնասիրելով ու վերլուծելով քրեադատավական նորմերը՝ նկատել են, որ դրանք սահմանում  են խափանման միջոցի յոթ ձևեր, իսկ համապատասխան խափանման միջոցի տեսակ պետք է ընտրել այն դեպքում, երբ քրեական գործով ձեռք բերված փաստական տվյալները, նյութերը բավարար հիմք են տալիս ենթադրելու, որ կասկածյալը կամ մեղադրյալը կարող են կատարել Քրեական դատավարության օրենսգրքով սահմանված, 135 հոդվածով մասնավորապես, ոչ իրավաչափ գործողություններից որևէ մեկը՝ թաքնվել վարույթ իրականացնող մարմնից, խոչընդոտել գործի քննությանը, կատարել նոր հանցանք կամ խոչընդոտել մինչդատական կամ դատական վարույթում գործի քննությանը։

«Ընդ որում, փաստերը պետք է պատշաճորեն արտացոլվեն որոշման  նկարագրական ու պատճառական մասում»,-ասաց փաստաբանն ու ավելացրեց, որ 2018-ի օգոստոսին քննիչի որոշումն ուսումնասիրելիս  նկատել են, որ պատճառաբանական մասում որևէ հիմքի մասին չի նշվում։

«Իսկապես քննիչի այդ որոշման մեջ որևէ հիմք նշված չէ»,-ասաց նա՝ ընդգծելով, որ Արմեն Գևորգյանի ազատ տեղաշարժի իրավունքն է խախտվել։

Նա խնդրեց վերացնել խափանման միջոցը, բավարարել միջնորդությունը, մերժման դեպքում քննարկել Արմեն Գևորգյանի՝ հոկտեմբերի 26-ից նոյեմբերի 4-ը ներառյալ Հայաստանից բացակայելու թույլտվության հնարավորությունը։ Փաստաբանն ասաց, փաստաթղթեր են ներկայացրել, որոնք վկայում են, որ բացակայությունն ինքնանպատակ չէ, Ավստրիայում Գևորգյանը պետք է բուժզննում անցնի։

«Բացի բուժզննումը Արմեն Գևորգյանը նույն երկրում պետք է մասնակցի գործնական հանդիպման, որի բնույթը մանրամասն ներկայացված է միջնորդության մեջ»,-ասաց փաստաբանը։

Դատավորի հարցին, թե Գևորգյանն ի՞նչ հիվանդություն ունի, որ պետք է բուժզննում անցնի, փաստաբանն ասաց՝ սրտի հետ կապված առողջական խնդիրներ կան։ Մեկնելու  է բժշկի հրավերով։

Արմեն Գևորգյանն էլ մանրամասնեց, որ Ավստիայում ամեն տարի բուժզննում է անցել, իսկ երկու տարին մեկ՝ սրտի անոթային խնդրի հետ կապված հետազոտություն։

Մեղադրող կողմի կարծիքով, երկու միջնորդությունն էլ ենթակա են մերժման, քանի որ չեն ներկայացվել անհրաժեշտ հիմնավորումներ ու բավարար հիմքեր։