Ռուբեն Մելիքյան. Հրայր Թովմասյանի սանիկի կալանավորումը պայմանավորած է քաղաքական դրդապատճառով
«Եթե չլիներ այդ պատճառը, որը երկու բառից է կազմված՝ Հրայր Թովմասյան, վստահ ենք, որ նաև չէին լինեի մարդու իրավունքների կոպտագույն խախտումները»,- լրագրողների հետ հանդիպմանն ասաց իրավապաշտպան, «Իրավական ուղի» ՀԿ համահիմնադիր Ռուբեն Մելիքյանը՝ խոսելով արդարադատության նախարարության աշխատակազմի օրինականության վերահսկողության տեսչության նախկին պետ, ՍԴ նախագահ Հրայր Թովմասյանի սանիկ Նորայր Փանոսյանի դեմ հարուցված քրեական գործի, նրա կալանավորման մասին։
Նա ներկայացրեց մի քանի հանգամանք, որոնք հիմնավորում են, որ այս ամենը կապված է Սահմանադրական դատարանի շուրջ տեղի ունեցող գործընթացների հետ։
«Առաջին. Նիկոլ Փաշինյանի և նրա ընտանիքի սեփականություն հանդիսացող թերթը, երբ որ հրապարակում էր այս տեղեկությունը, ոչ թե հրապարակում էր անուն-ազգանունով, այլ հենց այդպես էլ վերնագրել էր՝ Հրայր Թովմասյանի սանիկին մեղադրանք է առաջադվել, նա կալանավորվել է, Հրայր Թովմասյանի լուսանկարով»,- ասաց իրավապաշտպանը։
Նա նշեց, որ իր Նորայր Փանոսյանի փաստաբան Տիգրան Աթանեսյանի նկարագրած իրավիճակներում նման քրեական հետապնդում իրականացնելու որևէ դեպք իր պրակտիկայում չի հիշում։ Ռ. Մելիքյանն ասաց, որ այստեղ կա ստանդարտից տարբերվող բան, ողջամիտ այլ բացատրություն չկա, քան Հրայր Թովմասյանի նկատմամբ հետապնդումներն են։
«Մենք այստեղ հստակորեն գործ ունենք հատուկ, ընդհանուրից տարբերվող մոտեցման հետ. դա պայմանավորած է քաղաքական դրդապատճառով, և այդ քաղաքական դրդապատճառը պայմանավորած է իշխող քաղաքական ուժի քաղաքական խնդրով՝ չեզոքացնելու և վերահսկողություն սահմանել Սահմանադրական դատարանի նկատմամբ և որպես ՍԴ մարմնավորում տեսնում ենք Հրայր Թովմասյանին։ Թե քաղաքական, թե փսևդոիրավական հարթակներում տեսնում ենք բազմաթիվ քայլեր, որոնց դրսևորումը նաև այս կարմիր գծերը հատող մոտեցումն է»,- ասաց Ռ. Մելիքյանը։
Նա նշեց, որ քաղաքական հարթակի մասով ընդամենը վերջին նման դրսևորումը երեկ էր, երբ պատգամավորներից մեկը ֆեյսբուքյան ասուլիսի ժամանակ ասել է, որ եթե հանկարծ ՍԴ-ն կայացնի այլ որոշում, քան ակնկալում է քաղաքական մեծամասնությունը, ապա նրանք դիմելու են այլ քայլերի ՍԴ նկատմամբ վերահսկողություն սահմանելու համար։
«Ակնհայտ է, որ այստեղ գործ ունենք քաղաքական բովանդակություն ունեցող և իրավական ֆորմալիզմի շղարշ ունեցող հետապնդման հետ։ Այս հարցը մենք նաև իրավապաշտպան կառույցներով, որոնք այսօր շատ չեն, ցավոք սրտի, արդեն իսկ ներկայացրել ենք և շարունակելու ենք բոլոր հնարավոր ճանապարհներով ներկայացնել միջազգային իրավապաշտպան կառույցներ։ Դա ցավով ենք անում, քանի որ հաճելի չէ ներկայացնել այս խնդիրները, բայց ստիպված ենք անել, քանի որ մեր ներպետական ընթացակարգերը բարձր արդյունավետությամբ օժտված չեն այն դեպքերում, երբ իշխող քաղաքական ուժն իրականացնում է քաղաքական հետապնդում։ Արգելափակվող դատարանների պարագայում դժվար է ակնկալել, որ ուղղորդված իրավիճակներում դատարանները բոլոր դեպքերում կկարողանան բարձր պահել արդարադատություն իրականացնողի իրենց կոչումը»,- ասաց Ռ. Մելիքյանը։
Լրահոս
Տեսանյութեր
Ուղեվարձերի գումարի ավելացման վերաբերյալ քաղաքապետարանի հրապարակած թվերը ծիծաղելի են ու ամոթալի. Բաբկեն Պիպոյան
