Ձեր վստահելի աղբյուրը

«Շատ հանգիստ, առանց շտապելու, ուսումնասիրելով բոլոր փաստերը և խնդիրները՝ պատրաստվել ենք այս ամեն ինչին, այնպես որ ոչ մի մտավախություն չունենք կապված արբիտրաժի հետ: Եթե «Սանիթեք» ընկերությունն, այնուամենայնիվ, որոշի դիմել արբիտրաժային դատարան, մենք պատրաստ ենք դրան»,-  քաղաքապետարանում լրագրողների հետ զրույցում նշեց Երևանի քաղաքապետ Հայկ Մարությանը:

Նա հայտնեց, որ աղբահանության հարցերով զբաղվող նոր հիմնարկի կազմը և տեխնիկան համալրվում են և մոտակա ամիսների գործընթացը կավարտվի։

Լրագրողի հարցին ի պատասխան, թե միտումնավո՞ր էր «Սանիթեք»-ին դուրս թողնելը, Մարությանն ասաց. «Միտումնավո՞ր, այսինքն` դուք չե՞ք տեսել, թե ինչ էր կատարվում քաղաքում: Դա իրավական պրոցես էր և աշխատանք էր, որը ընթացքում կատարվում էր: Այս ամբողջ ընթացքում թիմն աշխատել է, պատրաստվել նրան, որպեսզի ճիշտ լինեն բոլոր փաստաթղթերը, դրա համար պետք էր երկար և մանրակրկիտ աշխատանք, և դրան պետք էր պատշաճ կերպով պատրաստվել»:

Անդրադառնալով սանմաքրման ներկայիս իրավիճակին՝ նա տեղեկացրեց. «Այս պահին փոփոխված է 4000 աղբաման, իսկ նախատեսվում է փոփոխել 9000-ը, այս պահին աշխատում է 34 մեքենա, նախատեսվում է, որ պետք է աշխատեն 54-ը: Դրական դինամիկան գնալով շատանալու է, և մի քանի ամիս անց արդյունքներն էլ ավելի տեսանելի կլինեն»։