Ձեր վստահելի աղբյուրը

Ամուլսարում ոսկի հանք շահագործելու խնդրով դատական մի քանի հայցեր կան, դատավարությունները դեռևս ընթացքի մեջ են։

Panorama.am-ի հետ զրույցում բնապահպան-իրավաբան Նազելի Վարդանյանն ասաց, որ 2018-ից վարչական դատարանում քննվում է Ջերմուկի և Գնդեվազի 19 բնակիչների հայցը։ Պատասխանողն  է ՀՀ բնապահպանության նախարար Էրիկ Գրիգորյանը։

Ջերմուկցիների և գնդեվազցիների ներկայացուցիչը հենց Ն. Վարդանյանն է։ Նա նշեց, որ իրենք պահանջում են՝ պարտավորեցնել նախարար Էրիկ Գրիգորյանին ուժը կորցրած ճանաչել փորձաքննության եզրակացությունը նոր ի հայտ եկած գործոններով։ Այսինքն՝ պարտավորեցնել ուժը կորցրած ճանաչել Ամուլսարի ոսկեբեր քվարցիտների հանքավայրի հանքաարդյունաբերական համալիրի փոփոխված նախագծի շրջակա միջավայրի վրա ազդեցության պետական փորձաքննական եզրակացությունը և ՀՀ բնապահպանության նախարարի 29.04.2016թ. դրա հաստատումը։ 

Մյուս հայցը կրկին  վարչական դատարանում է, քննում է արդեն 4 տարի։ Վայոց ձորի մարզի Գնդեվազ համայնքի բնակիչները դիմել են դատարան՝ պահանջելով անվավեր ճանաչել Ամուլսարի ոսկու հանքավայրի շահագործման բնապահպանական  փորձաքննությունը։

Ն. Վարդանյանն ասաց, որ նիստերը ուշ-ուշ են լինում, ձգձգվում են. նախ՝ բնապահպանության նախարարությունը պատասխանող  էր, հետո դատարանը որոշեց, որ պատասխանող չի կարող լինել, հանեց, հետո որոշեց որպես պատասխանող ներգրավել։  

Դատական գործին հայցվոր կողմի միջնորդությամբ ներգրավված են անկախ փորձագետներ WWF-հայաստանի տնօրեն Կարեն Մանվելյանը, ՀՀ Գիտությունների ազգային ակադեմիայի Էկոլոգանոոսֆերային հետազոտությունների կենտրոնի տնօրեն Արմեն Սաղաթելյանը և քիմիական գիտությունների թեկնածու Սեյրան Մինասյանը։ Պրոֆեսոր Արմեն Սաղաթելյանը մահացավ երեկ՝ ծանր հիվանդությունից։ Նույնիսկ հիվանդ ժամանակ նա սրտացավ էր Ամուլսարի հարցով ու դիմել էր վարչապետ Նիկոլ Փաշինյանին՝ դեռ ուշ չէ կանգնեցնել Ամուլսարի շահագործումը։

Նշենք, որ ջերմուկցիները, գնդեվազցիները չեն սահմանափակվել միայն դատարան դիմելով ու փորձելով հասնել նրան, որ Ամուլսարը չշահագործվի, այլ նաև պարբերաբար բողոքի ակցիաներ են իրականացնում, փակել են նաև դեպի Ամուլսար տանող ճանապարհը։