Ձեր վստահելի աղբյուրը

Հոկտեմբերի 12-ին 2016 թվականի ապրիլյան պատերազմում հերոսացած տղաներից Վահե Զաքարյանի ծննդյան օրն է։ Ջրականում (Ջաբրայիլ) ապրիլի 2-ին զոհված զինծառայող, տանկիստ Վահեն կդառնար 24 տարեկան:

Վահեն ծնվել էր 1995 թվականի հոկտեմբերի 12-ին Կոտայքի մարզի Հրազդան քաղաքում:  Տան միակ արու զավակն էր, ուներ երկու քույր: Սովորել է Հրազդանում, երբ ընտանիքով տեղափոխվել են Ռուսաստանի Դաշնություն, ութ ամիս հետո Վահեն որոշել է վերադառնալ Հայաստան և քույրերի հետ մնացել  է Հրազդանում: Դպրոցն ավարտելուց հետո ընդունվել է Ֆիզիկական կուլտուրայի և սպորտի պետական ինստիտուտ, նույն տարում էլ զորակոչվել է բանակ:

Փոքր տարիքից զբաղվել է սպորտով՝ կարատեով և արևելյան մարտարվեստով։ Բազում հաղթանակներ և մեդալներ ունի, բազմաթիվ միջազգային մրցույթների հաղթող էր։ Հայաստանում մասնակցել է բազմաթիվ մրցույթների։ Հայաստանի հանրապետության երկակի չեմպիոն է, ունի երկու սև գոտի։

Վահեն 2014 թվականին զորակոչվել է Հայոց բանակ, 6 ամիս ծառայել է Հոկտեմբերյանում և ուսումնական փուլն անցնելուց հետո, որպես տանկի նշանառու-օպերատոր, տեղափոխվել է ԼՂՀ՝ Ջաբրայիլ։ Ծնողների խոսքերով՝ Վահեն մեծ ոգևորությամբ է բանակ գնացել, ծառայությունը շատ լավ է անցել, երբեք չի բողոքել:

Վահեն զոհվել է մարտի դաշտում։ 2016թ-ի ապրիլի 2-ին հակառակորդի առաջխաղացումը կասեցնելու նպատակով` տանկի անձնակազմով մի քանի անգամ զորաշարժ է կատարել ու խոցել գրոհող թշնամուն՝ պատճառելով նրան կենդանի ուժի զգալի կորուստներ: Նույն տանկում եղել են անմահ հերոսներ Հայկ Գրիգորյանն ու Նորայր Գասպարյանը:

Վահեն ու Նորայրը մտերիմ ընկերներ են եղել, միասին կռվել են հակառակորդի դեմ ու միասին էլ զոհվել են:

Վահե Զաքարյանն ու Նորայր Գասպարյանը: