Ձեր վստահելի աղբյուրը

Հոկտեմբերի 14-ին ապրիլյան պատերազմի ժամանակ Ջրականում (Ջաբրայիլ) զոհված զինծառայող, 321-րդ տանկի անմահ հերոս, գյումրեցի Տիգրան Աբգարյանը կդառնար 23 տարեկան:

Հերոսի հարազատները պատմել են, որ Տիգրանի ծնունդը ամեն անգամ նշել են ընկուզենին թափ տալով ու պտուղները հավաքելով։ Այդ ավանդույթի հիմքը Տիգրանի պապիկն է դրել:

«Պապն ասում էր՝ հենց ծնունդդ գա, թափ կտանք, ու Տիգրանի մոտ տպավորվել էր, որ հոկտեմբերի 14-ը ընկուզենու թափ տալու օրն է»,- պատմել է Տիգրանի եղբայրը՝ Ժորա Աբգարյանը:

Այսօր բոլորն են հիշում 321-րդ տանկի անմահ հերոսներին: Ապրիլի ծավալված մարտական գործողությունների ժամանակ տանկի անձնակազմը՝ Բենիամին Եղոյանը, Տիգրան Աբգարյանը և Վլադիմիր Ալիխանյանը, երկու օր շարունակ հերոսաբար պայքարել են հակառակորդի դեմ: Հակառակորդի կողմից գրավված 9-րդ ՊՇ-ի N112 մարտական դիրքը տանկով հակագրոհելու ժամանակ, արհամարհելով հակառակորդի կողմից տարբեր ուղղություններով վարվող ինտենսիվ հրետանային կրակը, տանկիստները դուրս են եկել կրակային բնագծից, առաջ շարժվել դեպի գրոհող թշնամին, հընթացս կրակով  խոցել հակառակորդի 1 տանկ և բազմաթիվ գրոհայինների: Խոցվել են հակառակորդի կողմից ու զոհվել:

Տիգրանի զոհվելուց օրեր անց՝ ապրիլի 10-ին, Գյումրու ծննդատանը 2 կիլոգրամ 900 գրամ քաշով ծնված տղային՝ ի պատիվ գյումրեցի հերոսի՝ տանկիստ Տիգրան Աբգարյանի, անվանեցին Տիգրան: Այսօր փոքրիկ Տիգրանը Աբգարյանների ընտանիքի սիրելին է։

Հիշեցնենք,  որ սեպտեմբերի 15-ին Շուշիի Սուրբ Ղազանչեցոց Ամենափրկիչ եկեղեցում տեղի ունեցավ Ապրիլյան պատերազմում զոհված հերոսների հարազատների մկրտության արարողությանը: Տիգրան Աբգարյանի եղբայրը՝ Ժորա Աբգարյանը Շուշիում կնքեց հերոսի անունը կրող՝ փոքրիկ Տիգրանին։ 

Նշենք, որ ապրիլյան պատերազմի ժամանակ Հայրենիքի սահմանների պաշտպանության համար Արցախում հերոսաբար զոհված զինծառայողներից 7-ը Գյումրիից էին՝ Վլադիմիր Մելքոնյան, Մերուժան Ստեփանյան, Ալեքսան Առաքելյան, Վիկտոր Յուզիխովիչ, Հրաչ Գալստյան, Գևորգ Վարդանյան, Տիգրան Աբգարյան: