Ձեր վստահելի աղբյուրը

«Դամասկոսում ՀՀ դեսպանությունը և Հալեպում ՀՀ գլխավոր հյուպատոսությունն աշխատում են արտակարգ ռեժիմով»,- այս մասին այսօր լրագրողների հետ ճեպազրույցում հայտնեց Արտաքին գործերի նախարարի մամուլի խոսնակ Աննա Նաղդալյանը՝ անդրադառնալով Սիրիայի հյուսիսում թուրքական զորքերի ներխուժման հետևանքով տեղի ունեցող զարգացումներին։

Նա նշեց, որ Հայաստանի դիվանագիտական ներկայացոիցչությունը մշտական կապի մեջ են Ղամիշլիի և Սիրիայի հյուսիսային շրջանների համայնքային կառույցների հետ. «Մշակվում ու ձեռնարկվում են բոլոր հնարավոր քայլերը, որպեսզի բոլոր մեր հայրենակիցներին, որոնք ցանկություն են հայտնել տեղափոխվել հյուսիսային շրջաններից, աջակցել  այս գործում։ Մենք օպերատիվ տեղեկատվություն ենք ստանում մեր դիվանագիտական ներկայացուցչությունից՝ տեղում մեր հայրենակիցների իրավիճակի վերաբերյալ և ընդհանրապես՝ տեղում հումանիտար իրադրության վերաբերյալ»։

Նաղդալյանի խոսքով, ըստ տեղեկությունների, Սիրիայի հյուսիսային շրջաններում հայերի թիվը կազմում է 3  հազար մարդ, որոնք հիմնականում կենտրոնացած են Ղամիշլիի և Մալիքիայի բնակավայրերում։

«Առ այսօր այս բնակավայրերի մոտակայքում ռազմական բախումներ չկան։ Ներկա դրությամբ դրված չէ նաև այս երկու շրջաններից հայերի արտակարգ տեղափոխման հարցը, ինչի վերաբերյալ առաջարկությունները բավականին հնչում են տարբեր օղակներից»,- հավելեց խոսնակը։

Հիշեցնենք, որ Թուրքիայի նախագահ Ռեջեփ Թայիփ Էրդողանը հոկտեմբերի 9-ին պաշտոնապես հայտարարեց Սիրիայի հյուսիս-արևելքում ռազմական գործողություն սկսելու մասին։