Ձեր վստահելի աղբյուրը

Թրամփը խոստանում է ոչնչացնել Թուրքիայի տնտեսությունը, եթե Անկարան շարունակի Սիրիայում «վտանգավոր և կործանարար ճանապարհով»:

Պատժամիջոցեր ՆԱՏՕ-ի անդամ երկրի նկատմամբ, բայց ոչ պատերազմ

«Թուրքիայի նկատմամբ մեծ պատժամիջոցները գալիս են։ Արդյո՞ք մարդիկ մտածում են, թե մենք պետք է պատերազմենք ՆԱՏՕ-ի անդամ Թուրքիայի հետ։ Երբեք չվերջացող պատերազմները պետք է ավարտվեն»,- նախօրեին՝ հոկտեմբերի 14-ին, թվիթերում գրել է Թրամփը ու հայտարարել Թուրքիայի դեմ պատժամիջոցների սահմանման մասին՝ Սիրիայի հյուսիս-արևելքում Անկարայի ռազմական գործողության կապակցությամբ, և կոչ արել անհապաղ հրադադար հաստատել:

Թրամփը նշել է, որ հնարավորինս շուտ Անկարա կուղարկի փոխնախագահ Մայք Պենսին և ազգային անվտանգության հարցերով խորհրդական Ռոբերտ Օ'Բրայենին ՝ բանակցություններ սկսելու փորձի համար:

Պենսը հայտարարել է, որ Թրամփը հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ, որը խոստացել է  չհարձակվել սահմանամերձ Կոբանե քաղաքի վրա:
«Նախագահ Թրամփը նրան շատ հստակ հայտնել է, ԱՄՆ-ը ցանկանում է, որ Թուրքիան դադարեցնի ներխուժումը, անհապաղ հրադադար հաստատի և սկսի բանակցություններ վարել Սիրիայում քրդական ուժերի հետ՝ բռնություններին վերջ տալու համար», - ասել է Պենսը:

Պատժամիջոցների տակ են հայտնվել թուրք 3 նախարարներ

ԱՄՆ-ը պատժամիջոցներ է սահմանել Թուրքիայի կառավարության անհատների, սուբյեկտների կամ նրա գործընկերների նկատմամբ, որոնք ներգրավված են «այնպիսի գործողություններում, որոնք վտանգում են խաղաղ բնակչությանը կամ հանգեցնում են Սիրիայի հյուսիս-արևելքում խաղաղության, անվտանգության և կայունության հետագա վատթարացմանը»։ Այս մասին ասվում է ԱՄՆ պետքարտուղար Մայք Պոմպեոյի հայտարարության մեջ:

Պատժամիջոցների մասին հայտարարության մեջ Թրամփը հայտարարել է, որ դադարեցնում է բանակցությունները Թուրքիայի հետ 100 միլիարդ դոլարի առևտրային գործարքի շուրջ և բարձրացնում է պողպատի սակագները մինչև 50 տոկոս: Նախագահը պատժամիջոցներ է կիրառել նաև Թուրքիայի երեք բարձրաստիճան պաշտոնյաների և Թուրքիայի պաշտպանության և էներգետիկայի նախարարությունների համար:

Թուրքիայի տնտեսության ոչնչացում

Թրամփը հայտարարել է, որ «լիովին պատրաստ է արագորեն ոչնչացնել Թուրքիայի տնտեսությունը, եթե թուրք առաջնորդները շարունակեն այս վտանգավոր և կործանարար ճանապարհը»:

Թրամփը նշել է, որ Թուրքիայի ռազմական հարձակումը «սպառնում է քաղաքացիական անձանց և սպառնում է տարածաշրջանում խաղաղությանը, անվտանգությանն ու կայունությանը»:
Ըստ ԱՄՆ ֆինանսների նախարարության, Թուրքիայի պաշտպանության նախարար Հուլուսի Աքարը, ներքին գործերի նախարար Սուլեյման Սոյլուն և էներգետիկայի նախարար Ֆաթիհ Դոնմեսը հայտնվել են գերատեսչության պատժամիջոցների սև ցուցակում,  սառեցվել է նրանց ակտիվները Միացյալ Նահանգներում և արգելվել է նրանց հետ ԱՄՆ-ի կամ ԱՄՆ-ի հետ կապված գործարքները:

«Ես շատ հստակ եմ եղել Էրդողանի հետ. Թուրքիայի գործողությունները հանգեցնում են հումանիտար ճգնաժամի և պայմաններ ստեղծում հնարավոր պատերազմական հանցագործությունների համար։ Թուրքիան պետք է ապահովի քաղաքացիական անձանց, ներառյալ կրոնական և էթնիկ փոքրամասնությունների անվտանգությունը», - ավելացրել է Թրամփն իր հայտարարության մեջ:

Ֆինանսների նախարար Սթիվեն Մնուչինը հայտարարել է, որ պատժամիջոցները կվնասեն արդեն իսկ թույլ թուրքական տնտեսությանը, իսկ Պենսը նախազգուշացրել է, որ ԱՄՆ-ն կշարունակի ուժեղացնել պատժամիջոցները, քանի դեռ Թուրքիան «պատրաստ չէ հրադադարի հաստատման, չի նստում բանակցությունների սեղանի շուրջ և վերջ չի տալիս բռնություններին»:

Սիրիայում քրդերի պաշտպանության հարցում Թրամփն աջակցում է անգամ Նապոլեոն Բոնապարտին

ԱՄՆ նախագահ Դոնալդ Թրամփը թվիերում գրել է, որ Իսլամական պետության խալիֆաթի 100 տոկոսը վերացնելուց  հետո ԱՄՆ զորքերը հիմնականում դուրս բերվեցին Սիրիայից:

«Թող Սիրիան և Ասադը պաշտպանեն քրդերին և պատերազմեն Թուրքիայի դեմ՝ իրենց հողի համար: Ես իմ գեներալներին ասացի ՝ ինչու պետք է պատերազմենք Սիրիայի համար, Ասադի համար՝ պաշտպանելու մեր թշնամու երկի՞րը: Բոլորը, ովքեր ցանկանում են օգնել Սիրիայի քրդերի պաշտպանությանը, լավն են ինձ համար՝ լինի դա Ռուսաստանը, Չինաստանը, թե Նապոլեոն Բոնապարտը: Հուսով եմ, որ նրանք բոլորը լավ են, իսկ մենք 7,000 մղոն հեռավորության վրա ենք»,-գրել է Թրամփը։

Էրդողանը և Մակրոնը հեռախոսազանգով քննարկել են Սիրիան
Թուրքիայի նախագահականի հաղորդմամբ, Էրդողանը հեռախոսազրույց է ունեցել Ֆրանսիայի նախագահ Էմանուել Մակրոնի հետ, որի ընթացքում նա Ֆրանսիայի նախագահին բացատրել է Սիրիայի հյուսիս-արևելքում Անկարայի գործողությունների նպատակները, ասելով, որ գործողությունը կնպաստի տարածաշրջանային և համաշխարհային խաղաղությանն ու կայունությանը:
Կարմիր խաչը նախազգուշացնում է զանգվածային տեղահանման, ջրի սղության մասին
Թուրքիայի հարձակողական գործողությունների արդյունքում շարունակվող մարտերը կարող են հանգեցնել մինչև 300,000 մարդու տեղահանմանը Սիրիայի Հասակե և Ռաքքա նահանգներում, ասվում է Կարմիր խաչի միջազգային կոմիտեի (ԿԽՄԿ) հայտարարության մեջ: Ջրի պակասը նույնպես մեծ անհանգստություն է, հավելել է ԿԽՄԿ-ն։
«Շարունակվող ռազմական գործողություններն ավերիչ ազդեցություն են ունենում քաղաքացիական բնակչության վրա», - ասվում է կազմակերպության հայտարարության մեջ։

Սիրիական բանակը մտնում է Մանբիջ
Սիրիայի կառավարական ուժերը մտել են Մանբիջ, հայտնել է երկրի պետական «ՍԱՆԱ» լրատվական գործակալությունը ՝ առանց մանրամասներ հաղորդելու:

Չեխիան դադարեցնում է զենքի արտահանման արտոնագրերը Թուրքիա
Չեխիայի ՆԳ նախարար Յան Համաչեկը հայտարարել է, որ իր երկիրը դադարեցրել է զենքի և զինամթերքի վաճառքը Թուրքիային ՝ Սիրիայում նրա գործողությունների պատճառով:
«Չեխիան անմիջական ազդեցությամբ կասեցնում է Թուրքիա ռազմական տեխնիկայի արտահանման արտոնագրերը», - թվիթերում գրառում է կատարել Համաչեկը:
Հայտարարությունը հայտնի է դարձել այն բանից հետո, երբ Եվրամիության կառավարությունները ավելի վաղ պայմանավորվել էին սահմանափակել զենքի արտահանումը Թուրքիա:

ՄԱԿ. Թուրքիայի գործողությունների արդյունքում 160,000 մարդ տեղահանվել է
ՄԱԿ-ը հայտնում է, որ մինչև 160,000 մարդ տեղահանվել է հարևան Սիրիայում Թուրքիայի ռազմական գործողության պատճառով:
Օգնության գործակալություններն ավելի վաղ նախազգուշացրել էին, որ համարյա կես միլիոն մարդ վտանգված է սահմանամերձ տարածաշրջանում շարունակվող մարտերից:

Հիշեցնենք, որ Թուրքիան հոկտմբերի 9-ին հարձակումը Սիրիայի Սիրիայի հյուսիսում գտնվող քրդական աշխարհազորայինների դեմ, այն բանից հետո, երբ Թրամփը դուրս բերեց տարածաշրջանից ամերիկյան որոշ զորքեր։ Թուրքիան նշում է, որ «Խաղաղության աղբյուր» անունով օպերացիան նպատակ ունի վերացնել Սիրիայի հյուսիսային շրջաններից քրդական աշխարհազորային ստորաբաժանումները և այնտեղ ստեղծել «անվտանգության գոտի»: Այս գոտում նախատեսվում է տեղավորել երկու միլիոն սիրիացի փախստական, իսկ ԵՄ-ն էլ հայտարարում է, որ չի ֆինանսավորելու այս գոտում բնակեցումը։