Ձեր վստահելի աղբյուրը

ԱԺ նախկին պատգամավոր, գեներալ Մանվել Գրիգորյանի  առողջական վիճակի վատթարացման պատճառով օրեր առաջ հրավիրվել է կոնսիլիում,  3-4 բժշկական կենտրոններից հրավիրվել են 10-15 մասնագետներ, ախտորոշել են նոր հիվանդություններ: Լրագրողների հետ զրույցում ասաց Մ. Գրիգորյանի պաշտպաններից Լևոն Բաղդասարյանը:

«Տևական ռեժիմով անձը գտնվում է  կալանքի տակ, տևական ռեժիմով վերջինիս հիվանդություններն ավելանում են: Կոնսիլիումը եզրակացրեց, որ, ըստ էության, վիճակի վատթարացման պատճառ է հանդիսանում անձի խափանման միջոց կալանքը, մասնավորապես, ֆիզիակական  ակտիվության, արևի լույսի պակասը»,- նշեց նա:

Պաշտպանի խոսքով, միտում է տեսնում Գրիգորյանին պահել կալանքի տակ, խոշտանգել, արդեն իսկ, ըստ էության, կարելի է  փաստել անձը խոշտանգված է  բխող   բոլոր բացասական հետևանքներով:

«Գրիգորյանի նկատմամբ խոշտանգումն ակնհայտ է: Եզակի դեպք է, երբ բոլորը, բժշկական բոլոր կենտրոնները բարձրաձայնում են, որ անձի մոտ հիվանդությունների վատթարացում է, դատական համակարգում այսօր այսպես հանգիստ նստած են:  Անձի մոտ գնում է հիվանդությունների վատթարացում, անձը գտնվում է կալանքի տակ»,- ասաց Լ. Բաղդասարյանը:

Նա  նշեց, որ այստեղ պետությունը, կառավարությունը պոզիտիվ  պարտավորություն ունի առնել դրա դեմը, նաև սարերի հետևում չէ ՄԻԵԴ որոշումը, որն առաջնահերթության կարգով քննելու է  Գրիգորյանի գանգատն ընդդեմ Հայաստանի,  մասնավորապես  անօրինական կալանքի և խոշտանգման փաստի հետ կապված:

Նշենք, որ այսօր Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, կրկին մերժել է Մ. Գրիգորյանի պաշտպանների՝  նրան գրավի դիմաց ազատ արձակել միջնորդությունը:

Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաև կատարել է տարբեր տեսակի հափշտակություններ։ Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել է։ Պաշտպանների  մի քանի անգամ դիմել են խափանման միջոց կալանքը գրավով փոխելու միջնորդությունները, սակայն մերժվել են։ Մ. Գրիգորյանն արդեն ամիսներ շարունակ գտնվում է «Նաիրի» բժշկական կենտրոնում: