Ձեր վստահելի աղբյուրը

Ամերիաբանկն այսօր բացեց «Էջմիածին» մասնաճյուղը, որը մարզային ցանցում Բանկի թվով ութերորդ մասնաճյուղն է։ Արմավիրի մարզի Էջմիածին քաղաքի Մաշտոցի 69/51 հասեցում գտնվող մասնաճյուղը աշխատելու է շաբաթական 5 օր՝ երկուշաբթիից ուրբաթ, ժամը 9։30-ից մինչև 17:00: Մասնաճյուղն առաջարկում է արտոնյալ պայմաններով ծառայություններ բոլոր այն ֆիզիկական և իրավաբանական անձանց, ովքեր կդառնան Ամերիաբանկի հաճախորդ՝ բացելով հաշիվ «Էջմիածին» մասնաճյուղում մինչև 2020թ. հունվարի 31-ը ներառյալ։

«Էջմիածին» մասնաճյուղն առաջարկում է հատուկ պայմաններով հետևյալ ծառայությունները

Նոր իրավաբանական անձանց համար հաշիվ բացելու դեպքում.
• Ինտերնետ Բանկինգ/Մոբայլ Բանկինգ համակարգի տրամադրում՝ մեկ տարվա անվճար սպասարկմամբ
• Business տեսակի քարտի տրամադրում՝ մեկ տարվա անվճար սպասարկմամբ
• Ընկերության երկու ղեկավարին/իրական շահառուին մեկական դեբետային կամ կրեդիտային քարտի տրամադրում (բացառությամբ՝ Platinum կամ Infinite տեսակի քարտերի) մեկ տարվա անվճար սպասարկմամբ

Նոր ֆիզիկական անձանց համար հաշիվ բացելու դեպքում.
• Ինտերնետ Բանկինգ/Մոբայլ Բանկինգ և Հեռախոսային բանկինգ ծառայությունների անվճար տրամադրում
• Մեկ դեբետային կամ կրեդիտային քարտի (բացառությամբ՝ Platinum կամ Infinite տեսակի քարտերի) տրամադրում՝ մեկ տարվա անվճար սպասարկմամբ։

«Էջմիածին» մասնաճյուղի տարածքում տեղադրված են կանխիկի մուտքագրման բանկոմատ և վճարային տերմինալ։ Մասնաճյուղն իր տեխնիկական բարձր հագեցվածության, պրոֆեսիոնալ աշխատակազմի միջոցով կապահովի հաճախորդների բարձրակարգ սպասարկման համար բոլոր բարենպաստ պայմանները։

Մասնաճյուղը մատուցելու է Ամերիաբանկի կողմից առաջարկվող բոլոր ծառայությունները։

Ամերիաբանկի մանրածախ բանկինգի տնօրեն Արման Բարսեղյանը բացման արարողությունից հետո լրագրողների հետ զրույցում նշեց, որ իրենց ընդհանուր ռազմավարության մեջ, Երևանից բացի, մեծ շեշտադրում ունեն մարզերի ուղղությամբ։

«Վերջին տարիների ընթացքում բավականին ընդլայնել ենք մարզերում մեր ներկայացվածությունը։ Ընդհանուր առմամբ, փորձել ենք մեր ամբողջ շրջանակը՝ բիզնես վարկերից սկսած՝ ավարտած ֆիզիկական անձանց վարկերով, ներկայացնել հաճախորդներին»,- ասաց նա։

Մասնաճյուղի բացման արարողությանը ներկա էին նաև Արմավիրի մարզպետ Համբարձում Մաթևոսյանը և Էջմիածնի քաղաքապետ Դիանա Գասպարյանը։

«Շատ ենք կարևորում մարզերում բանկերի մասնաճյուղերի բացումը, քանի որ մեր պետական քաղաքականության մեջ է մտնում համաֆինանսավորման, սուբսիդավորման ծրագրերը, և սա նոր հնարավորություն է ավելի բարձր որակով սպասարկում ապահովելու համար»,- նշեց մարզպետը։

Նա հավելեց, որ մարզի բնակչությունը հիմնականում գյուղատնտեսության և վերամշակման հետ կապված վարկային պրոդուկտների կարիք ունի։