Ձեր վստահելի աղբյուրը

«Թուրքիային կանգնեցնելու իրական քայլը մեկն է՝ այն է՝ զորք մտցնել տարածք։ Այս հնարավորությունն ուներ ԱՄՆ-ը, որը չօգտագործեց այն, անգամ սահմանափակ քանակով զորքը դուրս բերվեցին։ Այսօր այդ հնարավորությունն արդեն ունի Սիրիայի Արաբական Հանրապետության բանակը՝ ՌԴ օգնությամբ։ Գործողությունները կկանգնեցվեն, եթե դեմ առ դեմ կանգնեն սիրիական ու թուրքկան բանակները»,- այսօր Թուրքիայի կողմից Սիրիայում ռազմական գործողության վերաբերյալ մամուլի ասուլիսում հայտարարեց արաբագետ Արմեն Պետրոսյանը։

Խոսելով Սիրիայում Թուրքիայի ռազմական գործողությունների մասին նկատմամբ արաբական երկրների արձագանքի վերաբերյալ՝ Արմեն Պետրոսյանն ասաց, որ ինչպես և ակնկալվում էր, այն կտրուկ էր, միանշանակ, բացառությամբ Կատարի ու Պաղեստինի ինքնավարությունը, որոնք ունեն Թուրքիայի աջակցությունը։  

«Արաբական երկրները տարածաշրջանում զիջել են իրենց դիրքերը այնպիսի մրցակիցների, ինչպիսիք են Իրանն ու Թուրքիան, հատկապես Սիրիայում, որը համարվում է արաբական աշխարհի ամենաառանցքաին պետություններից մեկը։ Թուրքիան և Իրանը փաստացի ներգրավված են, զինված ուժերն ու ազդեցության գոտիներն ունեն այս կարևոր հանգուցային երկրում, ինչը չունի ոչ մի արաբական երկիր»,-ասաց Արմեն Պետրոսյանը, հավելելով, որ Արաբական լիգայի երկրների արձագանքն ու քննադատությունը միայն իրավիճակային է և առարկայական նշանակություն չի կարող ունենալ Թուրքիային կանգնեցնելու համար։

Արաբագետը նշեց, որ գործողությունը սկսելուց առաջ Թուրքիան պայմանավորվածություններ ունեցել է մի կողմից ԱՄՆ-ի հետ, քանի որ այդ շրջանները գտնվում էին ԱՄՆ-ի ազդեցության տակ, մյուս կողմից ՌԴ-ի ու Իրանի հետ, քանի որ վերջիններիս հետ Աստանայի գործընթացում լուրջ հաջողություններ էին արձանագվել նախորդ 2 տարում։

«Մինչ այժմ եղած քայլերից կարելի է դիտարկել Քոբանիի դեմ Թուրքիայի հնարավոր  գործողությունը, որտեղ մնում են ամերիկյան զինծառայողներ, և Մանբիջի դեմ գործողությունը, որտեղ Թուրքիան ու ԱՄՆ-ը երկար ժամանակ համատեղ գործողություն էին իրականացնում։ Եվ մինչ այժմ այս 2  ուղղությամբ է եղել, որ մենք տեսել ենք ամերիկյան կողմի հստակ արձագանքը»,-ասաց արաբագետը։