Տեխնոլոգիաների զարգացումն առաջին հերթին մտածողության զարգացում է. Նիկոլ Փաշինյան
Տեխնոլոգիաների զարգացումն առաջին հերթին մտածողության զարգացում է։ Այս մասին այսօր «Գլոբալ ինովացիոն ֆորում 2019. Փոխակերպելով բանականությունը» համաժողովի բացման ժամանակ ելույթում ասաց վարչապետ Նիկոլ Փաշինյանը:
Կարևորելով միջոցառումի անցկացումը Հայաստանում՝ նշեց, որ նման միջոցառումները շատ կարևոր են մարդու և տեխնոլոգիաների հարաբերությունները կարգավորելու և զարգացնելու առումով։
«Ընդհանրապես, ամենասկզբից, առաջին ինդուստրիալ հեղափոխության օրերից արձանագրվել է մարդու վախը տեխնոլոգիաների նկատմամբ։ Երբ հայտնվում էին առաջին հաստոցները, որոնք գալիս էին փոխարինելու ինչ-որ չափով մարդու աշխատանքը, արհեստավորները, որոնք այդ ժամանակ բավական ազդեցիկ տնտեսական խավ էին, մտնում էին մանուֆակտուրաներ և ջարդուփշուր անում հաստոցները՝ ունենալով առաջին հայացքից շատ լեգիտիմ մտահոգություն: Մտահոգությունը հետևյալն էր՝ եթե այն աշխատանքը, որ անում ենք մենք՝ մարդիկ, պետք է անեն հաստոցը, ի՞նչ պետք է անենք մենք, ինչով պետք է զբաղվենք, ապրենք մենք: Բայց ժամանակը բերեց մի հետաքրքիր իրողություն։ Պարզվեց՝ երբ մարդու ձեռքերը շատ թե քիչ ազատվում են, առաջին հերթին ազատվում է մարդու միտքը, որը նոր տարածքներ գրավելու հնարավորություն է ունենում: Հետևաբար, տեխնոլոգիաների զարգացումն առաջին հերթին մտածողության զարգացում է»,- ասաց Նիկոլ Փաշինյանը։
Նրա խոսքով՝ նոր մտածողությունը բերել է նոր տեխնոլոգիաներ, նոր տեխնոլոգիաները հանգեցնում են նոր մտածողությանը և այդպես շարունակ։
«Երբ ասում ենք ինովացիա, առաջին հերթին նկատի պետք է ունենանք մտքի, մտածողության ինովացիա, որը փոխում է աշխարհը։ Շատ դեպքերում ինովացիա, տեխնոլոգիաներ ասելով մարդիկ հասկանում են կոնկրետ առարկաներ, գործիքներ, ծրագրեր, բայց իրականում ինովացիան տեղի է ունենում մեր մտածողության մեջ, զարգանում է մարդու միտքը»,- ընդգծեց նա։
Նիկոլ Փաշինյանը նշեց, որ այսօր ամենակարևոր հրատապ հարցերից մեկը կապված է արհեստական բանականության հետ և այդ նույն վախերն առաջանում են արհեստական բանականության զարգացման հետ:
«Տեխնոլոգիաների պատմությունը մեզ հույս է տալիս, որ արհեստական բանականության զարգացումը մարդու միտքը կազատի այնպես, ինչպես առաջին ինդուստրիալ հեղափոխության ժամանակ ազատվեցին մարդու ձեռքերը, ապա նաև միտքը: Այն մտավոր աշխատանքի մի մասը, որը կանի արհեստական բանականությունը, տարածք կազատի, որ մարդու մտածողությունը, միտքը նոր ուղղություններ հայտնաբերի, նոր տարածքներ նվաճի: Ես կարևոր եմ համարում, որ Հայաստանում այսօր մենք կարողանանք հաղթահարել վախերը ոչ միայն տեխնոլոգիաների նկատմամբ, այլ բոլոր վախերը»,- ընդգծեց նա։
Ըստ վարչապետի՝ վախն այն կարևոր գործոնն է, որ ամենուր խոչընդոտում է զարգացումը, առաջընթացը, հաղթանակի հասնելու ձգտումը:
«Ես հույս ունեմ, որ Գլոբալ ինովացիոն ֆորումի անցկացումը հայ ժողովրդին ու մարդկությանը կօգնի հաղթահարել ու կառավարել գլոբալ վախերը: Սա կլինի թերև ամենակարևոր արդյունքը, որին պետք է ձգտենք ոչ միայն այսօր, այլև առաջիկայում»,- հայտնեց Նիկոլ Փաշինյանը։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
