Ձեր վստահելի աղբյուրը

«ՍԴ նախագահ Հրայր Թովմայանի նկատմամբ ՀՔԾ կողմից քրեական գործի հարուցման համար հիմքեր չեմ տեսնում»,-Panorama.am-ի հետ զրույցում նման կարծիք հայտնեց  «Բաբայան քոնսալթինգ» ՍՊԸ հիմնադիր, իրավաբան Արսեն Բաբայանը։

Թեև նա համարում է, որ նախաքննական մարմնի իրավունքն է գործ հարուցելը և որոշակի ուսումնասիրություններ կատարելու համար է նպատակահարմար գտել։

Հիշեցնենք, որ այսօր ՀՔԾ-ն հաղորդագրություն տարածեց. ըստ որի ԱԺ պատգամավոր Արման Բաբաջանյանի կողմից ՀՀ գլխավոր դատախազին հաղորդում է ներկայացվել մի խումբ պաշտոնատար անձանց կողմից պետական իշխանությունը յուրացնելու առերևույթ հանցագործության դեպքի կապակցությամբ:  Հաղորդման հիման վրա ՀՔԾ-ում նախապատրաստված նյութերով որոշում է կայացվել ՀՀ քրեական օրենսգրքի 300-րդ հոդվածի 1-ին մասով քրեական գործ հարուցելու մասին:

Օրենսգրքի այդ հոդվածը սահմանում է. «Իշխանությունը զավթելը` բռնություն գործադրելու կամ բռնություն գործադրելու սպառնալիքի միջոցով, ինչպես նաև Սահմանադրությամբ չնախատեսված այլ եղանակով Հանրապետության Նախագահի, Ազգային ժողովի, կառավարության կամ սահմանադրական դատարանի լիազորություններին տիրանալը պատժվում են ազատազրկմամբ` տասից տասնհինգ տարի ժամկետով»։

ՀՔԾ-ից Panorama.am-ի հետ զրույցում հաստատեցին, որ քրեական գործի շրջանակում քննչական գործողություններ են իրականացվել ինչպես ՀՀԿ գրասենյակում, այնպես էլ այլ վայրերում։

Բաբայանն ընդգծում է՝ ամեն դեպքում քրեական գործ հարուցելու համար հիմքեր չի գտնում։

«Իրավական առումով ամեն ինչ ավելի քան պարզ է՝ հաշվի առնելով մասնավորապես Սահմանադրության 95 հոդվածը, որը սահմանում է պատգամավորական մանդատի անհամատեղելիությունը»,-մանրամասնում է իրավաբանը։

Հիշեցնենք, որ Սահմանդրության 95 հոդվածն ասում է. «Պատգամավորը չի կարող զբաղեցնել իր կարգավիճակով չպայմանավորված պաշտոն պետական կամ տեղական ինքնակառավարման այլ մարմիններում, որևէ պաշտոն` առևտրային կազմակերպություններում, զբաղվել ձեռնարկատիրական գործունեությամբ, կատարել վճարովի այլ աշխատանք, բացի գիտական, կրթական և ստեղծագործական աշխատանքից»։

ԱԺ աշխատակազմի ղեկավարի նախկին տեղակալ Արսեն Բաբայանը հիշեցնում է, որ դեռ անցած տարվա սեպտեմբերին ԱԺ-ն պաշտոնական դիրքորոշում է տվել, որի համաձայն, հաշվի առնելով Սահմանդրության 95 հոդվածը՝ այսինքն պատգամավորական մանդատի անհամատեղելիությունը և Հրայր Թովմասյանի՝ Սահմանադրական դատարանի դատավոր ընտրվելու հանգամանքը, ԱԺ նախագահի կողմից կազմվել է անհամատեղելիության արձանագրություն։

«Այդպիսով դադարեցված է համարվել ԱԺ պատգամավոր Հրայր Թովմասյանի լիազորությունները, ինչը և արվել է թե վարչապետ Փաշինյանի, այն ժամանակ փոխվարչապետ Արարատ Միրզոյանի կողմից՝ այլ անձանց  պաշտոններում նշանակվելու  կամ ընտրվելու կապակցությամբ։ Դա սովորական պրոցես է՝ Սահմանադրությամբ ու ԱԺ կանոնակարգ օրենքով նախատեսված, զուտ իրավական հարց է, հետևաբար, իմ կարծիքով, քրեական գործ հարուցելու առիթ չէր կարող հանդիսանալ»,-ասում է ընկերության տնօրենը։

Բաբայանն ընդգծում է, որ ՍԴ դատավոր ընտրվելուց հետո Հրայր Թովմասյանը ԱԺ պատգամավորի գործառույթներից որևէ մեկը չի իրականացվել՝ մասնավորապես չի մասնակցել հանձնաժողովների նիստերին, լիագումար նիստերին, չի քվեարկել։

«Եվ ընդհանրապես պատգամավորի լիազորություններից որևէ մեկից չի օգտվել մի պարզ պատճառով, որ Սահմանադրության 95 հոդվածի համաձայն, ԱԺ պատգամավոր Հրայր Թովմասյանի լիազորությունները համարվել են դադարեցված»,-նշում է նա։

Կա կարծիք՝  ՍԴ նախագահ Հրայր Թովմասյանի դեմ հետապնդում է իրականացվում, ավելի վաղ Թովմասյանն էլ հայտարարել էր, որ իր  լիազորությունների դադարեցման գործընթացը քաղաքական է։

Այս հարցի մասին խոսելիս Արսեն Բաբայանն ասաց՝ ինքը բազմիցս խոսել է դատական իշխանությունների նկատմամբ իրականացվող հետապնդումների մասին,  դրա որոշակի դրսևորումներին ականատես են եղել այս ընթացքում։

«Իհարկե, Սահմանադրական դատարանը մերժեց ԱԺ դիմումի վարույթ ընդունելը, բնականաբար պետք է հաջորդեր որևէ այլ քայլ։ Հավանաբար, գործադիր իշխանությունը նպատակահարմար գտավ այս քայլը։ Ինձ համար դա անասպասելի էր, քանի որ մասնագիտական առումով չկա որևէ հիմք նման քրեական գործ հարուցելու համար։ Այս մասով, այն անկանխատեսելի էր»,-ասաց իրավաբանաը՝ չցանկանալով քաղաքական գնահատականներ տալ։