Ձեր վստահելի աղբյուրը

«Areda Survey» հետազոտությունների կենտրոնը սոցհարցում է իրականացրել Թուրքիայում՝ պարզելու, թե հանրությունն ինչպես է վերաբերվում Սիրիայի հյուսիս-արևելքում թուրքերի սկսած «խաղաղության ակունք» ռազմական գործողությանը: Սոցհարցմանը մասնակցել է 2160 քաղաքացի: Նրանց 76%-ը ողջունել է Սիրիայում ծավալվող Թուրքիայի ռազմական գործողությունները: Այս մասին գրում է ermenihaber-ը։

Հարցման մասնակիցների 77.2%-ը վստահ է, որ Թուրքիան հաջողելու է այդ օպերացիան, 46.5%-ը կարծիք է հայտնել, որ Թուրքիան դեռ մի բան էլ ուշացրել ներխուժումը Սիրիա: Նրանց 73.3%-ն այդ ռազմագործողությունը ոչ թե «պատերազմ» է որակել, այլ՝ «ահաբեկչության դեմ պայքար»:

Մասնակիցների 74.5%-ը համոզված է, որ «խաղաղության ակունք» ռազմական գործողությունն ապահովելու է Թուրքիայի ներքին անվտանգությունը:

67.9%-ի կարծիքով` գործողության թիրախում է «Քուրդիստանի բանվորական» կուսակցությունն է, իսկ ըստ 20.3%-ի`ԱՄՆ-ն:

«Հարկ եղած դեպքում կմասնակցե՞ք այդ ռազմական օպերացիային» հարցին, մասնակիցների 77.8%-ը դրական, 22.2%-ը բացասական պատասխան է տվել:

Հիշեցնենք, որ Թուրքիայի ռազմական գործողությունները դատապարտողների դեմ քրեական հետապնդումներ են իրականացվում: Սոցցանցերում ռազմագործողությունը քննադատող 839 օգտատեր է հայտնաբերվել, որից 62-ը եղել է Գերմանիայից, Անգլիայից և Ֆրանսիայից:

Թուրքիայի ոստիկանությունը «սև քարոզչություն իրականացնելու, ժողովրդի մեջ ատելություն տարածելու» հոդվածի հատկանիշներով 186 քաղաքացու բերման է ենթարկել: Բերման ենթարկված կասկածյալներից 24-ը ձերբակալվել է, իսկ 78-ը՝ ազատ արձակվել: Մյուսների նկատմամբ հետաքննությունը շարունակվում է: