Ձեր վստահելի աղբյուրը

Սահմանադրական դատարանի և մասնավորապես դատարանի նախագահ Հրայր Թովմասյանի դեմ իրականացվող գործընթացը սկիզբ  առավ այն ժամանակ, երբ ակնհայտ դարձավ, որ իշխանությունը չի տիրապետում Սահմանադրական դատարանին, այսինքն՝ Սահմանադրական դատարանը չի գտնվում իշխանության վերահսկողության ներքո։  Panorama.am-ի հետ զրույցում նման պնդում արեց փաստաբան Երվանդ Վարոսյանը։

«Ցանկացած իշխանություն, որը Հայաստանը տեսնում է որպես իրավական պետություն, պետք է դրանից միայն ուրախանար։ Բայց  ամեն ինչ սրվեց հատկապես Ռոբերտ Քոչարյանի գործի հետ կապված Սահմանդրական դատարանի որոշումներից հետո, քանի որ Հայաստանում իրավական բոլոր գործընթացները պտտվում են Ռոբերտ Քոչարյանի քրեական գործի շուրջ, ՍԴ-ի նկատմամբ  ճնշումները դարձան էլ ավելի սաստիկ՝ արշավ մամուլում, որին հետևեց կարգապահական վարույթը, հետո նորից արշավ, ապա՝ սանիկներ, հիմա արդեն քրեական գործ այն բանից հետո, երբ ՍԴ-ն վարույթ չընդունեց  Հրայր Թովմասյանի լիազորությունները դադարեցնելու վերաբերյալ դիմումը։ Հիմա հարց՝ մեկ ու կես տարի առաջ ինչո՞ւ հատուկ քննչական ծառայությունն այս փաստով գործ չէր հարուցում, էս ամեն ինչը վաղուց մամուլում կար, ինչի՞ էին սպասում, ՍԴ-ն ԱԺ միջնորդությունը վարույթ ընդունելո՞ւ է, թե՞ չէ։ Լավ, էսքանից հետո ինչ-որ մեկը կարող է հավատալ, որ սա իրավական գործընթա՞ց է»,-ընդգծում է փաստաբանը։

Վարոսյանի համոզմամբ, իրականացվողը կոնկրետ հետապնդում է իշխանության մեկ ճյուղի նկատմամբ։

«Այստեղ Հրայր Թովմասյանի անձն էլ կարևոր չէ։ Խնդիր է դրվում, արդյո՞ք Սահմանադրական դատարանը կախյալ լինելո՞ւ է օրվա իշխանությունից, թե՞ ոչ։ Խոսքը միայն սրան է վերաբերում, մնացած ամեն ինչ ածանցյալ է»,-ասաց նա։

Քիչ առաջ հայտնի դարձավ, որ ԱԱԾ են հրավիրվել ՍԴ նախագահի թոշակառու հայրը, դուստրերը։ Ընտանիքի անդամներին այս ամենի մեջ ներքաշելը, Վարոսյանի խոսքով, բոլոր սահմանների ու կարմիր գծերի հատումն է։

«Ես չեմ հիշում նման բան անկախ Հայաստանի ողջ պատմության մեջ։ Անկախ անձնական հարաբերություններից, քաղաքական ու տնտեսական դրդապատճառներով հետապնդումներից, նման սահմաններ երբևէ հատված չեն եղել»,-նշեց նա։

Ըստ փաստաբանի, այս գործընթացը երկու լուծում ունի՝ կամ Հայաստանում կլինի օրվա իշխանությունից անկախ Սահմանդրական դատարան, կամ էլ կլինի «օրվա իշխանությանը կից բուտկա»։

«Երրորդ տարբերակ ես ուղղակի չեմ պատկերացնում։ Ես ենթադրում եմ, որ այս ամենը անհետևանք անցնել չի կարող, բացի այն բանից, թե միջազգային կառույցներն ի՞նչ ռեակցիա կտան այս ամեն ինչին, կարծում եմ, որ հայաստանյան իրավական համայնքը չի կարող լռել։ Անկախ ունեցած քաղաքական դիրքորոշումներից, այն իրավաբանները, որոնք սատարում են գործող իշխանությանը, հենց այդ իշխանության լավը ցանկանալով, պիտի ձայն բարձրացնեն, որպեսզի իշխանությունը թույլ չտա այն սխալները, որոնք անում է»,-ասաց նա։