Ձեր վստահելի աղբյուրը

Նախօրեին Ryanair իռլանդական բյուջետային ավիաընկերությունը հայտարարեց Հայաստան մուտք գործելու մասին՝ առաջարկելով միանգամից 4 ուղղություններ՝ Զվարթնոց օդանավակայանից չվերթներ Հռոմ, Միլան, Բեռլին, Գյումրիից՝ Մյունխեն։ Ryanair-ի մուտքը հայկական օդային տարածք լայն հետաքրքրություն է առաջացրել՝ հաշվի առնելով այն, որ մարդիկ հնարավորություն կունենան ավելի մատչելի ճամփորդել, ինչպես նախօրեին հայտարարեց Ryanair-ի կոմերցիոն ղեկավար Դեյվիդ Օ՛Բրայանը, միջինը 35 եվրոյով։

Ընկերության ստեղծման պատմությունը
Ryanair-ը ստեղծվել է 1984թ.-ին Իռլանդիայում՝ սկզբում որպես «Danren Enterprises», իռնալդացի գործարարներ Թոնի Ռայնի, Քրիստոֆեր Ռայնի, Լայան Լոներգանի կողմից։ Ավիաընկերությունն այնուհետ անվանվել է «Ryanair» (Ռայնէյր)` Թոնի Ռայնի անունով։ Այն սկսել է գործարկվել 1985թ.-ին՝ 15 տեղանոց ինքնաթիռով՝ Իռլանդիայի Ուոթերֆորդ օդանավակայանից դեպի Լոնդոնի Գեթվիք օդանավակայան։

Այսօր արդեն Ryanair-ը Եվրոպայի ամենախոշոր ավիաընկերությունն է ու ունի ամենամեծ ցանցը Եվրոպայում։ Այս տարի  այն սպասարկելու է 150 մլն հաճախորդի, հաջորդ տարի այն հասցնելով 200 մլնի։ Ընկերությունն ունի մոտ 500 օդանավ ու 2000-ից ավելի ուղղություններ։

Ինչպես է խնայում Ryanair-ը՝ առաջարկելով իսկապես մատչելի ավիատոմսեր
Ryanair-ը խնայում է ամեն տեղ, որտեղ հնարավոր է։ Հաճախ այն հայտնվում է քննադատության թիրախում՝ աշխատանքային հարաբերությունների պատճառով։ Ընկերությունը հրաժարվում է ճանաչել արհմիություններին։

Ընկերության հիմնադրման վաղ շրջանում այն ունեցել է մոտ 450 աշխատակից, որոնցից յուրաքանչյուրն ունեցել է իր մասնաբաժինը, սակայն պայմանավորվածություն է եղել, որ աշխատողները չպետք է միանան աշխատանքային միությունների, որոնք կարող են ազդել ընկերության վրա: Այդ ժամանակից ի վեր, սակայն, աշխատողների նկատմամբ վերաբերմունքը զգալիորեն փոխվել է, և նոր աշխատակիցներն այլևս բաժնետոմսեր չեն ստանում ընկերությունում:

2017-ի դեկտեմբերին Ryanair-ը հայտարարեց, որ կճանաչի օդաչուների արհմիությունը, սակայն դեռևս քննարկում է այն։

Աշխատանքի պայմանները
Ryanair-ի օդաչուները տասնյակ հազարավոր եվրոներ են վճարում ուսուցման համար, այնուհետև Իռլանդիայում ստեղծում են ՍՊԸ-ներ, որպեսզի օդաչուները աշխատեն Ryanair-ի համար՝ գործակալության միջոցով։

2015-ի մայիսին Կոպենհագենի քաղաքապետը հայտարարեց «Ryanair» բոյկոտի մասին: Սա տեղի ունեցավ դանիական արհմիությունների բողոքի ցույցերի ֆոնին՝ կապված աշխատանքային պայմանների հետ: Այն բանից հետո, երբ դատական քննությունը հաստատեց արհմիությունների գործադուլի իրավունքը, Ryanair-ն իր կենտրոնակայանները հանեց Դանիայից:

Օժանդակ եկամուտներ և թռիչքային ծառայություններ
Ryanair-ը խնայում է ամեն տեղ, որտեղ հնարավոր է։ Ryanair-ի եկամտի 20 տոկոսը ստացվում է օժանդակ ծառայություններից. այն է՝ տոմսերի գներից բացի այլ աղբյուրներից: 2009 թվականին օժանդակ եկամուտը կազմել է 598 միլիոն եվրո։

Որպես ցածր գնային բիզնեսի մոդելի մաս՝ ավիաընկերությունը գանձում է վճարներ, որոնք կարող են կապված լինել այլընտրանքային ծառայությունների հետ, ինչպիսիք են օդանավակայանի առցանց գրանցվելու փոխարեն օդանավակայանում գրանցումը, ուղեբեռի տեղափոխումը։ Օդանավում այն առաջարկում է սնունդ և խմիչքներ՝ գումարի դիմաց։

2009թ.-ին արդեն Ryanair-ը վերացրեց օդանավակայանում «check-in»-ը՝ գրանցումը, 10 եվրոյի դիմաց ու այն փոխարինեց միայն առցանց գրանցմամբ։ Ուղորները, որոնք կգան օդանավակայան առանց առցանց գրանցման՝ տուգանվում են 55 եվրոյով։

Օդանավի հարմարությունները
Ryanair-ի նոր օդանավերը մատակարարվում են չշարժվող նստատեղերով, առանց նստատեղի գրպանների, իսկ անվտանգության թերթիկները փակցված են նստատեղերի հետևում։ Սա նպաստում է ինքնաթիռի վրա խնայողությանը, ինչպես նաև օգնում աշխատակիցներին մաքրել այն կարճ  ժամանակում։

Անգամ տեղեկություններ եղան, որ ընկերությունը ցանկանում է հանել ինքնաթիռներից զուգարաններն ու ավելացնել ևս 6 նստատեղ, կամ գումար գանձել դրա համար, սակայն այս կանոնը կյանքի չկոչվեց։ Ինչպես ասել էր ընկերության գլխավոր գործադիր տնօրեն, Իռլանդիայի ամենահարուստ մարդ Մայքլ Օ՛Լիրին, դա «տեխնիկապես անհնար էր և օրինականորեն բարդ», բայց հետաքրքիր էր և շատ էժան PR»:

Գովազդային ապակողմնորոշում
Ryanair-ը հիմնականում թռիչքներ է կատարում մեծ քաղաքների փոքր օդանավակայաններից, որոնք հեռու են գտնվում՝ գովազդելով մեծ քաղաքները, ինչը կարող է ապակողմնորոշել ուղևորին։ Օրինակ Միլանում թռիչք է կատարում Բերգամո օդանավակայան, որը 45 կմ հեռու է Միլանից, Փարիզում՝ Բովե օդանավակայան, որը 85 կմ հեռու է քաղաքից և այլն։

Ներկայում օգտագործվող օդանավերը
2019թ.-ի սեպտեմբերի դրությամբ Ryanair-ն օգտագործում է 418  Boeing 737-800 օդանավեր և 1 Boeing 737-700 օդանավ՝ թրեյնինգների համար։ Պատվիրված է ևս 135 ինքնաթիռ։ Օդանավերի միատեսակ լինելը ևս խնայողության արդյունքում է, որի համար չի պահանջվում ունենալ տարբեր տեսակի ինքնաթիռների մասնագետներ։

Օդավաների տարիքը
2018 թվականի մարտի դրությամբ Ryanair-ի օդանավերի միջին տարիքը կազմում էր շուրջ 6,5 տարի, ինչը մոտ 2 տարի ավելի մեծ էր, քան մրցակիցներինը։

Վթարներ և միջադեպեր
2008 թ. նոյեմբերի 10-ին, Ֆրանկֆուրտից Ryanair-ի ինքնաթիռը Հռոմի  օդանավակայանում վթարային վայրէջք էր կատարել թռչունների հետ բախման պատճառով։ Օդանավում եղել էին  անձնակազմի վեց անդամ և 166 ուղևոր, որից անձնակազմի երկու անդամ և ութ ուղևոր տեղափոխվել էր հիվանդանոց՝ չնչին վնասվածքներով։