Էրիկ Գրիգորյանը՝ պոչամբարի վթարի մասին

Հասարակություն 14:04 17/10/2019 Հայաստան

Էրիկ Գրիգորյանը՝ պոչամբարի վթարի մասին

Շրջակա միջավայրի նախարար Էրիկ Գրիգորյանը կառավարության նիստից հետո լրագրողների հետ զրույցում անդրադառնալով Զանգեզուրի պղնձամոլիբդենային կոմբինատի պոչամբարի վթարին՝ նշեց, որ դեպի պոչամբար գնացող խողովակաշարի վթարից տեղի է ունեցել արտահոսք։

Այսինքն, ըստ նրա, անմիջապես պոչամբարից չէ արտահոսքը։ Էրիկ Գրիգորյանը նշեց, որ խողովակի անցքը զոդել են, և կարծում է՝ ջրերի հոսք այլևս չկա։

Նրա խոսքով՝ այդ խողովակաշարը Քաջարանից տասնյակ կիլոմետրերով անցնում է մինչև հասնում է Արծվանիկի պոչամբար. «Միգուցե ընթացիկ վերանորոգումներ իրականացվում են, բայց պարբերաբար այսպիսի վթարներ լինում են: Իհարկե, մեղավորությունը գործարանինն է»,- ընդգծեց նախարարը։

Ըստ նախարարի՝ Բնապահպանական և ընդերքի տեսչական մարմինը, Առողջապահության տեսչությունը փորձանմուշներ են վերցրել. «Ամեն մեկն իր մասով իր գործը կանի, բնապահպանական օրենսդրությունը սահմանում է ատիժների, վնասների փոխհատուցման չափը, որը կհաշվարկեն, կներկայացնեն»։

Էրիկ Գրիգորյանն ասաց, որ աղտոտման ծավալներն ու վնասի աստիճանը տեսչական մարմինը պետք է որոշի վարույթի շրջանակներում։

Լրագրողները հետաքրքրվեցին՝ ի՞նչ չափի վնասի մասին կարող է խոսք լինել, նախարարը պատասխանեց․ «Իրականում բնապահպանական վնասների փոխհատուցման ծիծաղելի սակագներ են սահմանված, շատ փոքր գումարների մասին է խոսք գնում։ Ներկայումս նախարարությունն ամբողջովին վերանայում է այդ համակարգը, և տուգանքների չափը պատիկներով ավելացվելու է։ Տարիներ առաջ էլ եղել են վթարներ, հաշվարկել են վնասը՝ 500, 600 հազար դրամ և դրանով հարցը փակվել է»:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: