Ձեր վստահելի աղբյուրը

ՍԴ նախագահ Հրայր Թովմասյանի հայրն ու երկու դուստրն այսօր հրավիրվել էին ԱԱԾ բացատրության տալու: Այս մասին ԱԱԾ-ի դիմաց լրագրողների հետ զրույցում ասաց նրանց պաշտպան Հայկ Սարգսյանը:

«Աղջիկների բացատրության բովանդակությունից մենք հասկացանք, որ հարցերը հիմնականում վերաբերում էին նրանց սեփականության  իրավունքով պատկանող գույքերին, որոնք, ըստ էության շատ չեն»,- ասաց պաշտպանը:

Նրա ներկայացմամբ, ավագ աղջկա դեպքում համապատասխան գույքը Կենտրոն վարչական շրջանում ավտոտնակն է, որը 2016 թ. նվիրատվությամբ ստացել է մորաքրոջ աղջկանից, իսկ կրտսեր աղջկա միակ գույքը  2014 թ. արտադրության «Նիսսան Սենտրա» մակնիշի ավտոմեքենան է, որ 2016 թ. կրկին ստացել է մորաքրոջ աղջկանից որպես նվեր: 

«Ընդ որում, նվեր ստանալու պատճառն այն է, որ մորաքրոջ աղջիկը մշտական բնակության է մեկնել  ԱՄՆ և որոշել է իր սեփականության իրավունքով պատկանող գույքը նվիրել երկու քույրերին»,- ասաց Հ. Սարգսյանը:

Նաև նշեց, որ որոշակի հարց եղել է կարճ ժամանակահատվածում ավագ դստերը պատկանող «Նիսսան Պատրոլ» մեքենայի վերաբերյալ, որը վերջինս Ապրիլյան պատերազմի ընթացքում կամ հաջորդող օրերին նվիրաբերել է Արցախի պաշտպանության բանակին:

Պաշտպանն ասաց, որ Հրայր Թովմասյանի գործունեության հետ կապված հորը՝ Վարդան Թովմասյանին ու աղջիկներին որևէ հարց չի տրվել:

Նրանց մյուս պաշտպանը  Ամրամ Մակինյանը նշեց, որ Հ. Թովմասյանի հորը հարցրել են նրա բնակարանի տանիքի հետ կապված՝ երբ են վերանորոգել, ինչ միջոցներով:

«Պարզաբանում է տրվել,  թե ինչպես է վերանորոգվել՝ Վարդան Թովմասյանի միջոցներով հարևանների, ընկերների, շինարարների օգնությամբ  2007 թվականին»,- ասաց պաշտպանը:

Նա նաև նշեց, որ Վարդան Թովմասյանի ինքնազգացողությունը ԱԱԾ-ում չի վատացել. «Երբ լրագրողը հարց ուղղեց պարոն Թովմասյանին, ես պատասխանեցի, որ  ինքնազգացողությունը  լավ չէ, այլ ոչ թե վատացել է ԱԱԾ-ում: Թյուրըմբռնում է եղել լրագրողի կողմից»:

Հարցին, թե կրկին նրանց կհրավիրե՞ն ԱԱԾ, պաշտպաններն ասացին, որ որևէ բան հայտնի չէ:

«Քրեական վարույթի վաղ փուլ է, ինչն ինքնին ենթադրում է,  որ եթե վարույթն առաջ գնա,  կկանչվեն նաև հարցաքննության»,- ասաց Ա. Մակինյանը: