Ձեր վստահելի աղբյուրը

«Նման գումարի մասին խոսք անգամ լինել չի կարող, հարկատուների հաշվին որևէ գումար չի տրամադրվում»,- լրագրողների հետ զրույցում ասաց փոխվարաչպետ Տիգրան Ավինյանը՝ պատասխանելով հարցին, թե Ryanair ավիաընկերության՝ հայաստանյան շուկա մուտքի ու էժան տոմսերի մասին հայտարարությունից հետո խոսակցություններ կան, որ պետական բյուջեից որոշակի գումար է տրամադրվելու այդ ընկերությանը:

Նա նշեց, որ արտոնություն է սահմանվել բոլոր այն ընկերությունների համար, որոնք որ նոր ուղղություններով դեպի Զվարթնոց և Զվարթնոցից այդ ուղղությամբ նախորդ տարվա  12 ամսում չեն իրականացրել կանոնավար չվերթ: Արտոնությունը ենթադրում է օդի տուրքի չեղարկում:

«Ոչ մի ուրիշ արտոնություն չկա»,- ընդգծեց Տ. Ավինյանը:

Նա նշեց, որ այդ արտոնությունը նոր դաշտ է ստեղծում, որպեսզի մրցակցությունն ավելի բարելավի, նոր խաղացողներ մտնեն շուկա:

Հարցին, թե այդ դեպքում ինչպե՞ս է կարողանալու այդ ընկերությունն աշխատել այդ մեթոդով, փոխվարչապետն ասաց, որ ծանոթ չէ իրենց բիզնես ծրագրի մանրամասներին, դետալներին, բայց  նմանատիպ ընկերությունների ամբողջ տրամաբանությունն այն է, որ նրանք կենտրոնանում են հնարավորինս էֆեկտիվության վրա:

Տիգրան Ավինյանը նշեց, որ մի քանի  ուղղությամբ են աշխատում. «Միանշանակ,  Հայաստանի նման երկիրը հնարավորինս իր կապերը օդային ճանապարհով ամրապնդելու և ուղիղ չվերթների  քանակն ավելացնելու խնդիր ունի: Դա  մեր ռազմավարությունն է: Երկրորդ ուղղությանն այն է, որ  պետք է զարգացնել տեղական ավիափոխադրողների ծրագրի խթանումը, ինչն ավելի երկարաժամկետ ծրագիր է, 1-2 տարի հետո կարող ենք խոսել այդ մասին»: