Ձեր վստահելի աղբյուրը

ՀՀ փոխվարչապետ Տիգրան Ավինյանը բավականին դրական է գնահատում Կադաստրի կոմիտեի ղեկավար Սարհատ Պետրոսյանի աշխատանքն այդ ոլորտում: Լրագրողների հետ զրույցում ասաց, որ նախքան Ս. Պետրոսյանն իր հրաժարականի դիմումը հրապարակել, հանդիպել է իր հետ, ներկայացրել իր ունեցած տեսակետները, ունեցած խնդիրները քաղաքաշինության կոմիտեի նախկին ղեկավար Ավետիք Էլոյանի հետ, ով այժմ իր խորհրդականն է և քաղաքաշինության կոմիտեի ներկա ղեկավարի հետ:

«Ինձ համար տրամաբանությունը մի փոքր ընդունելի չէ, նույնն է, որ առողջապահության նախարարը հարաժարական տա, որովհետև չի համաձայնվում աշխատանքի և սոցիալական հարցերի նախարարի քաղաքականության հետ»,- ասաց նա:

Տ. Ավինյանը ենթադրում է՝  Պետրոսյանը հիասթափված էր, որ այդ պաշտոնը հնարավորություն չէր տալիս քաղաքաշինության ոլորտում որոշակի գործունեության ծավալել:

Ս. Պետրոսյանի այն հայտարարությունը, որ «այլևս չեմ կարող հանդուրժել դիլետանտիզմն ու կոռումպացվածության հասնող թայֆայականությունը», փոխվարչապետը որակեց որպես  «շատ հետաքրքիր հայտարարություն», առաջարկում է փորձել նրանից անպայման պարզաբանում ստանալ դրա վերաբերյալ, որովհետև դա իր համար էլ է նորություն: Նշեց, որ նրա հետ հանդիպմանն այդ մասին որևէ խոսք չի եղել: 

«Կոռումպացվածության մասին որևէ պաշտոնյանի որևէ խոսք անգամ չի գնացել»,- ասաց Տ. Ավինյանը:

Ինչ վերաբերում է Ս. Պետրոսյանի այն հայտարարությանը, որ քաղաքաշինության բնագավառում հետընթաց կա, փոխվարչապետն ասաց, որ նա չի եղել քաղաքաշինության կոմիտեի ղեկավար, դժվար ծանոթ լինի այն բոլոր խնդիրների խորքին, որ առկա են քաղաքաշինության  ոլորտում:

«Իհարկե, միգուցե թվում է, թե մեկ այլ հարակից ոլորտ ղեկավարելով կարող ես բոլոր խնդիրներին ծանոթ լինել, կարծում եմ, այդպես չէ»,- ասաց Տ. Ավինյանը: