Ձեր վստահելի աղբյուրը

ԱԺ աշխատակազմի ղեկավարի նախկին տեղակալ Արսեն Բաբայանի ձերբակալությունը ոչ միայն իրավաչափ չէ, այլև ապօրինի է։ Panorama.am-ի հետ զրույցում նման պնդում արեց փաստաբան Երվանդ Վարոսյանը։

Panorama.am- Պարոն Վարոսյան, Ձեր կարծիքով, իրավաչա՞փ է Արսեն Բաբայանի ձերբակալությունը։
Երվանդ Վարոսյան-Ոչ միայն իրավաչափ չէ, այլև ապօրինի է այն պարզ պատճառով, որ ձերբակալումը Քրեական դատավարության օրենսգրքրի իմաստով, անձի փախուստը կանխելու նպատակով ձեռնարկվող հարկադրանքի միջոց է։ Այն ձեռնարկվում է  անմիջապես հանցագործությունը կատարելու պահին կամ հանցագործության կատարումից անմիջապես հետո, եթե անձի վրա կան հանցագործությունն իր կողմից կատարած լինելու մասին վկայող հետքեր կամ որևէ ականատես վկա նրան մատնացույց է անում որպես ենթադրյալ հանցագործություն կատարողի։ Ձերբակալության իմաստն այն է, որ այլ տարբերակ չկա, պետք  է մարդուն երեք օրով գոնե ազատությունից զրկել, որպեսզի ներկայացնեն դատարան՝ նրա նկատմամբ խափանման միջոց ընտրելու։ Այսինքն, նման անհետաձգելի իրավիճակ պետք է լինի։
Բայց ամենակարևորը՝ ձերբակալումը կիրառվում է միայն անձի փախուստը կանխելու նպատակով։ Արսեն Բաբայանը Հատուկ քննչական ծառայություն հրավիրվել է, ինքն իր ոտքով գնացել է։ Այստեղ ամեն ինչ ավարտվում է, մնացածը լիրիկա է։ Չի կարող ձերբակալվել մի մարդ, ով օրենքով սահմանված կարգով, պատշաճ ձևով ընդունելով հրավերը՝ ներկայանում է վարույթն իրականացնող մարմնին։

Panorama.am -Մինչ այս հարցազրույցը, ես խոսեցի ՀՔԾ-ի հետ։ Ծառայությունից ասացին՝ ձերբակալությունը տեղի է ունեցել  փախուստը կանխելու նպատակով, «քանի որ իրենք հիմք» ունեն։
Երվանդ Վարոսյան -ՀՔԾ-ից չէին կարող ասել, «մենք հիմքեր չունենք, կատարում ենք քաղաքական հրահանգ ու մենք գործիք ենք»։ Կարո՞ղ էին նման բան ասել, կարո՞ղ էին ասել, որ մենք ապօրինի մարդկանց ազատությունից զրկում ենք, որ հասնենք մեր ուզած նպատակին՝ Սահմանադրական դատարանի հետ կապված։ Կարո՞ղ էին ասել։

Panorama.am -Դուք մտածում եք՝ այդպե՞ս է։
Երվանդ Վարոսյան -Ես չեմ մտածում, իրենք հենց դա են անում։

Panorama.am -Ձերբակալությունների այս շղթային ամեն օր մի նոր օղակ է ավելանում։ Ձեր՝ որպես փաստաբանմի կոչը, հորդորը ո՞րն է։
Երվանդ Վարոսյան -Դադարեցնել այս հոգեխանգարմունքը։ Սա վտանգավոր է թե՛ պետության, թե՛ այն իրագործողների համար։ Հասկացե՛ք։ Իմ ցավը գիտե՞ք որն է, էլի փոխվելու է իշխանությունը, էլի ձերբակալությունների շարան է լինելու։ Այս ամեն ինչից մենք պետք է դուրս գանք վերջ ի վերջո, պիտի պետություն կառուցենք։ Մեկը պիտի մի օր նստի, մտածի՝ մեր դատարանը ինչպիսին պետք  է լինի, ինչպիսին պետք է լինի այս կամ այն հարցի  լուծումը։ Հիմա հաջորդ իշխանափոխությունից հետո պիտի կանչեն Սասուն Խաչատրյանին, ասեն՝ Սասուն Խաչատրյան, մեզ ասա, Արսեն Բաբայանին ինչի՞ ձերբակալեցիք։ Ու ես էլի նստելու եմ, ասեմ, լավ ժողովուրդ, եկեք անցնենք էս ամեն ինչով։ Չի կարելի է նման բան անել, խնդիրն այս է։

Panorama.am -Պարոն Վարոսյան, տարբեր իրավաբաններ հայտարարեցին, որ Արսեն Բաբայանին մեղադրանք է առաջադրել իրավական մի ակտով, որը համաներված է։
Երվանդ Վարոսյան -Ես ասում եմ՝ գլոբալ առումով, սա ապօրինի է։ Եվ այն արարքը, որը դրված է Բաբայանի կասկածանքի հիմքում, անգամ ընկել է համաներման տակ, այստեղ ավելացնելու ուրիշ բան չկա։ Նոր Հայաստանում ամեն ինչ կարելի է, ի՞նչ խնդիր կա։ Ես չեմ զարմանա, եթե փորձեն պոստ ֆակտում մեղադրանք լրացնել, որպեսզի արդարացնեն իրենց արածը։ Սակայն դա չի ստացվի։ Ակնհայտ է, թե սա  ինչ պրոցես է, ինչին է ուղղված։ Իշխանության ուզուրպացիա է և վերջ։