Պիոտրովսկի. Էրմիտաժի և Խ. Աբովյանի տուն-թանգարանի միջև համագործակցության հիմքեր կդրվեն

Մշակույթ 16:06 22/10/2019 Հայաստան

Պիոտրովսկի. Էրմիտաժի և Խ. Աբովյանի տուն-թանգարանի միջև համագործակցության հիմքեր կդրվեն

ՌԴ Պետական Էրմիտաժի տնօրեն, Ռուսաստանի գիտությունների ակադեմիայի թղթակից անդամ Միխայիլ Պիոտրովսկին հոկտեմբերի 20-ին այցելել է Խաչատուր Աբովյանի տուն-թանգարան: Այս մասին տեղեկանում ենք Խաչատուր Աբովյանի տուն-թանգարանի տուն-թանգարանի ֆեյսբուքյան էջից:

Թանգարանի տնօրեն Սյուզաննա Խոջամիրյանը հյուրին ներկայացրել է Աբովյանների տոհմական տան պատմությունը, անդրադարձել մեծանուն լուսավորչի կյանքին ու գործունեությանը:

Մ. Պիոտրովսկու համար ճանաչողական շրջայց է կազմակերպվել նաև թանգարանի գլխավոր ցուցասրահում: Այցելուների տպավորությունների մատյանում հյուրը հետևյալ գրառումն է արել.
«Խորին շնորհակալություն հայ մշակույթի Արարատի՝ Աբովյանի մասին հիշողությունը պահպանելու համար: Թանգարանը հրաշալի ներկայացնում է համաշխարհային մշակույթը ընկալելու և իրենը դարձնելու հայերի պատրաստակամությունը: Ձեզ մոտ շատ հարմարավետ է»:

Միխայիլ Պիոտրովսկին իր խոսքում հատուկ շնորհակալություն է հայտնել թանգարանի անձնակազմին Խաչատուր Աբովյանի պայծառ հիշատակը վառ պահելու համար և խոստացել, որ մոտ ապագայում ՌԴ Պետական Էրմիտաժի և Խաչատուր Աբովյանի տուն-թանգարանի միջև համագործակցության հիմքեր կդրվեն:

Հանդիպման ավարտին Մ. Պիոտրովսկին Աբովյանների տոհմատան պատշգամբում թեյի սեղանի շուրջ զրուցել է թանգարանի աշխատակիցների հետ: Թանգարանի տնօրեն Ս. Խոջամիրյանը պատվավոր հյուրին նվիրել է Խ. Աբովյանի՝ Վ. Ժուկովսկուն գրած նամակի կրկնօրինակը:

Հարակից հրապարակումներ`

Միխայիլ Պիոտրովսկին` Կարմիր բլուրում

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: