Ձեր վստահելի աղբյուրը

Արսեն Բաբայանին դատարան չէին բերել և  դատական նիստ տեղի չունեցավ: Այս մասին դատարանի դիմաց ակցիայի մասնակիցներին հայտնեց փաստաբան Երվանդ Վարոսյանը:

«Դատավորը պարտավոր էր  ձերբակալման  օրինաչափության հարցը քննարկման առարկա դարձնել  24 ժամվա ընթացքում:  24 ժամն անցել է, նիստը տեղի չի ունեցել: Արսեն Բաբայանին դատարան չեն ներկայացրել, որպեսզի նիստ լինի:  Նիստը նշանակվել է վաղը, ժամը՝  17.45-ին: Մեր պաշտպանյալի ներկայությունը չի ապահովվել, նա դատարան չի բերվել: Ձևական նիստ է նշանակվել  ու չի  արվել, ինչ ասեմ»- ասաց Վարոսյանը:

Փաստաբանը նաև հստակեցրեց, որ  դատարանն ու վարույթ իրականացնող մարմինը պետք է ապահովեին Բաբայանի  ներկայությունը նիստին: Փոխարենը նոր մեղադրանք է առաջադրվել. «Նոր  մեղադրանք է առաջադրվել  առ այն, որ   ինչ-որ անձանց կողմից,  անհայտ միջոցներով  իշխանության յուրացում է եղել: Մեղադրանքն իրականության հետ աղերս ունենալ չի կարող, ով ինչ ցուցմունք ուզում է տալ: Մեղադրանքը  Արսեն Բաբայանի հետ  առնչություն չունի: Այն առնչություն չունի  ՀՀ ՍԴ -ի հետ, սա «պլան գ»-ն է , սրանից հետո լինելու է «դ-ն, ճ-ն» և այլն»,- նշեց փաստաբանը:

Ինչ վերաբերում է  առաջադրված մեղադրանքին, ապա Վարոսյանն ասաց, որ  որպես իրավաբան առաջադրված տեքստին գնահատական տալ չի  կարող: 

Հիշեցնենք, որ այսօր Կենտրոն  և Նորք Մարաշ վարչական շրջանների ընդհանուր իրավասության  դատարանում  պետք է քննվեր ԱԺ աշխատակազմի ղեկավարի նախկին տեղակալ  Արսեն Բաբայանի ձերբակալության իրավաչափության հարցը: