Ձեր վստահելի աղբյուրը

Խորհրդարանն այսօր քննարկում է «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» օրենքում լրացում կատարելու մասին հարցը։ Նախագծի հեղինակն է «Իմ քայլը» խմբակցության պատգամավոր Վարազդատ Կարապետյանը։

«Անկախ դիտվող ջրիմուռների և բակտերիաների քանակից՝ այս տարի ունենք դրական տեղաշարժ, Սևանի մակարդակն այս տարի, անցած տարվա նույն  ժամանակահատվածի համեմատ, մոտ 5 սմ-ով ավելի բարձր է։  Մոտավորապես 30 մլն խմ օրենքով սահմանվածից պակաս ջրառ է իրականացվել։ Մենք առաջարկում ենք, որ 170 միլիոն խմ ջրառը լինի վերին սահման և կառավարության կողմից դրանից վեր սահմանի առաջարկ-խնդրանք չներկայացվի ԱԺ»,- ասաց նա։

«Լուսավոր Հայաստան» խմբակցության պատգամավոր Գևորգ Գորգիսյանը՝ դիմելով նախագծի հեղինակին ասաց, որ իր մոտ տարակուսանք է առաջանում օրինագծի հետ կապված։

«Օրինագծում մնում է այն կետը, որտեղ հստակ ասվում է՝ տնտեսական, խիստ անհրաժեշտության, ինչպես նաև չնախատեսված, արտակարգ իրավիճակների դեպքում կառավարությունը Սևանա լճի մասին ՀՀ օրենքով սահմանված կարգով կարող է ԱԺ քննարկմանը ներկայացնել չափաքանակի փոփոխության մասին ժամանակավոր ծրագիր, որը հաստատում է համապատասխան օրենքի ընդունմամբ։ Ձեր բերած դրույթը սա չի չեղարկում, սա մնում է, հետևաբար իմաստը ո՞րն է այս ամեն ինչի»,- հարցրեց Գորգիսյանը։

Կարապետյանն ասաց, որ իրենք էլ են նկատել այդ խնդիրը և այս ընթերցումների միջև եղած հատվածում այս դիտարկումները կներառեն։