ՆԱՏՕ-ն քննարկել է Սիրիայում ստեղծված ճգնաժամը՝ առանց Թուրքիային մեղադրանքներ առաջադրելու

Քաղաքական 09:35 25/10/2019 Տարածաշրջան

ՆԱՏՕ-ն քննարկել է Սիրիայում ստեղծված ճգնաժամը՝ առանց Թուրքիային մեղադրանքներ առաջադրելու

Բրյուսելում նախօրեին տեղի է ունեցել ՆԱՏՕ-ի անդամ երկրների պաշտպանության նախարարների առաջին հանդիպումը՝ Սիրիայի հյուսիս-արևելքում քրդական ուժերի դեմ թուրքական ռազմական գործողությունների սկսվելուց հետո: Փորձագետների կարծիքով, դաշինքը չի կարող կորցնել ռազմավարական դաշնակցին` նրան մեղադրանքներ առաջադրելով։ Նշվում է, որ ԱՄՆ-ն անհանգստացած է, որ այս անգամ հավատարիմ դաշնակիցը՝ Թուրքիան, կարող է դիմել Ռուսաստանին: Այս մասին գրում է euronews-ը։

«Սիրիայի հյուսիս-արևելքում իրավիճակի շուրջ ՆԱՏՕ-ի առաքելության կոչեր չեն եղել: Ես համոզված եմ, որ մենք պետք է ջանք գործադրենք քաղաքական գործընթացին աջակցելու համար: ՆԱՏՕ-ն նաև աջակցում է ՄԱԿ-ի ջանքերին՝ սիրիական ճգնաժամի քաղաքական լուծում գտնելու համար»,- ասել է ՆԱՏՕ-ի գլխավոր քարտուղար Յենս Ստոլտենբերգը։

Գերմանիայի պաշտպանության նախարար Աննեգրեթ Կրամպ-Կարրենբաուերը պաշտպանել է ՄԱԿ-ի հովանու ներքո Սիրիայի հյուսիսում միջազգային պաշտպանական գոտի ստեղծելու գաղափարը, սակայն նախագահներ Էրդողանի և Պուտինի միջև Սոչիում ձեռք բերված պայմանավորվածությունը կարող է խանգարել այս նախաձեռնությանը:

Բելգիայի արտաքին գործերի նախարար Դիդիե Ռեյնդերսն էլ ասել է, որ իրենք դեմ չեն միջազգային գոտուն, սակայն այս պահի դրությամբ որոշակի իրավիճակ է ստեղծվել տեղում՝ Թուրքիայի և Ռուսաստանի միջև պայմանավորվածությունների արդյունքում:

Հիշեցնենք, որ հոկտեմբերի 22-ին Սոչիում Ռուսաստանի և Թուրքիայի միջև կնքված համաձայնագրի շրջանակներում Անկարան համաձայնեց սահմանափակել իր ռազմական գործողությունները Սիրիայի հյուսիսում:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: